استانا. 11 اقپان. قازاقستانداعى ەڭ اتاعى جوعارى بوكسشى قىز مارينا ۆولنوۆا قازىرگى كۇندەرى انا اتانۋعا دايىندالىپ ءجۇر. بۇل تۋرالى «كازاحستانسكايا پراۆدا» حابارلادى.
قازاقستاندا بوكستان ۇدايى ءبىر قالىپتى ونەر كورسەتىپ, جوعارى تابىستارعا جەتىپ كەلە جاتقان بىردەن-ءبىر بوكسشى مارينانىڭ سوڭعى جارىسى كۇزدە ينچحوندا وتكەن ازيا ويىندارى بولدى. سول سايىستا ول تاعى دا ءوزىنىڭ جوعارى دەڭگەيىن تانىتىپ, قولا مەدالدىڭ جۇلدەگەرى اتاندى. ال ويىنداردان كەيىن مارينانىڭ جاڭا ءومىرى باستالدى: ول قولعابىن شەگەگە ءىلدى, تۇرمىس قۇردى...
وسىلايشا مارينا ۆولنوۆا جاڭا ءومىردىڭ تابالدىرىعىنان اتتادى. لوندون وليمپياداسىنىڭ جۇلدەگەرى قازىر استانا قالاسىندا تۇرادى. انا بولۋعا دايىندالىپ ءجۇر. قازاقستان بوكسىنىڭ ماقتانىشى بولعان قىزدىڭ قانداي جوسپارلارى بار ەكەن. مۇنى ودان Kazpravda.kz ءتىلشىسى سۇرادى.
– ۇمىتپاعاندارىڭىز ءۇشىن راحمەت, – دەدى مارينا تىلشىگە. – جۇكتىلىك كەزەڭى جاقسى ءوتىپ جاتىر. جاراتقان قولداسا, مامىر ايىندا انا بولامىن. مەن تۇرمىسىم ءۇشىن شەكسىز باقىتتىمىن. بالا تاربيەسىنە پسيحولوگيالىق جاعىنان دايىندالىپ ءجۇرمىن. ءبارى جاقسى بولۋعا ءتيىس!
- بوكستى قويعان كەزىڭىزدە ءسىز ۇلتتىق قۇراماعا سوزبەن دە, ىسپەن دە كومەك بەرەتىنىڭىزدى ايتىپ ەدىڭىز...
- ءيا, مەنىڭ جارىستاردان العان تاجىريبەم مول. قۇراماداعى قۇربىلارىم ءۇشىن دە قاشاندا ءازىرمىن. الەم چەمپيوناتى الدىندا قىزدار ماعان كەلىپ كەتتى. وتە جاقسى اسەر ەتتى. مەن قولىمنان كەلگەنشە ولارعا دەم بەرىپ باقتىم.
بىلەسىزدەر مە, مەن قازاقستان ءۇشىن چەدجۋدىڭ تابىستى بولاتىنىنا سەندىم. ءبىزدىڭ قۇرامادان شىققان تۇڭعىش الەم چەمپيونى نازىم قىزايبايدىڭ جەڭىسىنە قۋانىشتىمىن. مەن ونىڭ قالاي جۇمىس ىستەيتىنىن جاتتىعۋ كەزىندە كورگەنمىن. مەن ءۇشىن ونىڭ وسىنداي جەتىستىككە جەتۋى تاڭ قالارلىق نارسە بولعان جوق.
قازاقستاننىڭ ايەلدەر بوكسى ۇدەمەلى تۇردە دامىپ كەەلدى. قازىر ءبىزدىڭ كوماندامەن جۇرتتىڭ ءبارى ساناسادى. سوڭعى ناتيجەلەر (وتكەن جىلى قازاقستان قۇراماسى ازيادا مەن پلانەتا جارىسىندا ەكى جۇلدەدەن الدى) – وسىعان دالەل. ءبىز كەز كەلگەن قارسىلاسپەن تەڭ شايقاسۋعا دايىنبىز.
- ءسىزدىڭ رينگكە قايتا ورالۋىڭىز مۇمكىن بە؟ نەمەسە جاتتىقتىرۋشىلىق جولعا اۋىساسىز با؟
- ازىرگە بۇل سۇراقتار اشىق كۇيىنشە قالسىن. ءدال قازىرگى ساتتە مەنىڭ مۇلدە باسقا جوسپارلارىم بار.
ەسكە سالا كەتەيىك, مارينا ۆولنوۆا قازاقستان ايەلدەر قۇراماسىنداعى وليمپيادانىڭ قولا جۇلدەگەرى, الەمنىڭ كۇمىس جانە قولا جۇلدەگەرى, ازيا ويىندارىنىڭ قولا جۇلدەگەرى, ازيا چەمپيونى دەگەن اتاقتاردى جەڭىپ العان جالعىز بوكسشىسى. ول 75 جانە 81 كيلوعا دەيىنگى, 81 كيلودان اۋىر سالماقتاردا ونەر كورسەتتى. جاتتىقتىرۋشى بەرىك مىرجىقپاەۆتىڭ شاكىرتى. قازاق ءتىلىن وتە جەتىك بىلەدى.
رۋسلان يگىلىك.