قيمىلدى شيراتاتىن قادام

نۇرلان تەمىربەكوۆ, د.سەرىكباەۆ اتىنداعى شقمتۋ رەكتورى, فيزيكا-ماتەماتيكا عىلىمدارىنىڭ دوكتورى, پروفەسسور, ۇعا كوررەسپوندەنت-مۇشەسى. مەملەكەت باسشىسىن ۇلىقتاۋ سالتاناتىنا قاتىسقانىمدا, نۇرسۇلتان ءابىش ۇلىنىڭ قازىرگى جاھاندىق ەكونوميكالىق ءھام ساياسي داعدارىس الدىندا تۇرعان الەمدەگى ءىرى ساياساتكەرلەردىڭ ورتاسىنان ويىپ تۇرىپ ورىن الاتىنىن, ويى وزىق ساياساتكەر تۇلعانىڭ تاۋەلسىز ەلىمىزدىڭ ماڭدايىنا ءبىتۋى تەگىن ەمەس ەكەنىن تاعى ءبىر ءتۇيسىندىم. ەلباسى اتا زاڭعا سايكەس سايلاۋدان كەيىنگى بارلىق شارالاردى شيراق قيمىلمەن اتقارۋعا كىرىسىپ كەتتى. ۇكىمەت قۇرامى قايتا جاساقتالدى. جاڭعىرتۋ جونىندەگى ۇلتتىق كوميسسيا قۇرىلدى. ۇلىقتاۋ سالتاناتىندا پرەزيدەنت ەلدىڭ الدىندا كوپتەگەن كەلەلى ىستەر تۇرعانىن جەتكىزدى. سونىڭ ءبىرى – بەس ينستيتۋتتىق رەفورمانى ويداعىداي جۇزەگە اسىرۋ. بۇل جوسپاردى ورىنداۋعا ۇلىقتاۋ سالتاناتىنان كەيىن-اق كىرىسۋ اتالعان حالىقتىق رەفورمالار مەن ونى اتقارۋ تەتىگى سانالاتىن پرەزيدەنت جانىنداعى كوميسسيانىڭ قانداي ماڭىزعا يە ەكەنىن كورسەتىپ بەردى. البەتتە, بۇگىنگىدەي قۇبىلمالى كەزەڭدە ءبىزدىڭ ىشكى ساياساتىمىز بەن ەكونوميكامىزدىڭ بەرىكتىگى, تۇراقتىلىعى اۋاداي قاجەت. ويتكەنى, بۇل ءبىزدىڭ تاۋەلسىزدىك جىلدارى قول جەتكىزگەن ەڭ باستى بايلىعىمىز. مەملەكەتىمىز الەمنىڭ دامىعان 30 ەلىنىڭ قاتارىنا ەنۋ مىندەتىن العا قويىپ وتىر. وسى ورايدا, جاڭعىرتۋ جونىندەگى ۇلتتىق كوميسسيا مەملەكەتتىك ورگاندار, ازاماتتىق قوعام ينستيتۋتتارى مەن كاسىپكەرلىك سالاسىنىڭ ءوزارا قارىم-قاتىناسىن ۇيلەستىرۋگە سەپ بولادى دەگەن ويدامىن. كوميسسيا قۇرامىنا شەتەلدىك ساراپشىلاردىڭ الىنۋى سىرتقى فاكتورلاردى دا ەسكەرۋگە كومەكتەسەدى. تۇپتەپ كەلگەندە, بارلىق جوبا-جوسپارىمىز بەن ءىس-قيمىلىمىز, ەڭبەگىمىز «نۇرلى جول» جاڭا ەكونوميكالىق ساياساتىن جەمىستى جۇزەگە اسىرۋعا قىزمەت ەتۋى ءتيىس. وسكەمەن.