بۇگىن الماتىدا «جەڭىستىڭ ەستەلىگى: ۇرپاقتار مەن حالىقتار بىرلىگى» اتتى كونفەرەنتسيا ءوتتى. كەزدەسۋ بارىسىندا قازاقستاندىق جانە رەسەيلىك ساراپشىلار ەكى ەل جاستارىن تاريحي ەستەلىكتەردى ساقتاۋعا شاقىرىپ, تاريحي ورتاق ماسەلەلەردى تالقىلادى. بۇل ءىس-شارا جەڭىستىڭ 80 جىلدىعىن بىرلەسە اتاپ ءوتۋدىڭ باستاماسى بولدى, دەپ جازادى Egemen.kz.
كونفەرەنتسيا جۇمىسىنا قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ابزال نۇكەنوۆ, قر مادەنيەت جانە اقپارات ءمينيسترى ايدا بالاەۆا, رەسەي فەدەراتسياسى پرەزيدەنتىنىڭ شەت ەلدەرمەن ايماقارالىق جانە مادەني بايلانىستار جونىندەگى باسقارماسى باسشىسىنىڭ ورىنباسارى انتون رىباكوۆ, رەسەي فەدەراتسياسىنىڭ جاستار ءىسى جونىندەگى فەدەرالدىق اگەنتتىگى باسشىسى گريگوري گۋروۆ, ەكى ەلدىڭ عالىمدارى مەن ساراپشىلارى, سونداي-اق بەلسەندى جاستار قاتىستى.
ايدا بالاەۆا قاتىسۋشىلاردى ايتۋلى مەرەيتويمەن قۇتتىقتاپ, وتانداستارىمىزدىڭ جەڭىسكە قوسقان ۇلەسى تۋرالى كەڭىنەن باياندادى.
قازاقستاندىقتار ماسكەۋ, ستالينگراد, لەنينگراد تۇبىندە ەرلىكپەن شايقاسىپ, بالتىق ەلدەرى, ۋكراينا, پولشا, گەرمانيا, فرانتسيا, قىتاي جەرلەرىندە پارتيزاندىق قوزعالىستارعا قاتىستى.
قازاقستاندىق ءاليا مولداعۇلوۆا, مانشۇك مامەتوۆا, تالعات بيگەلدينوۆ, باۋىرجان مومىش ۇلى, قاسىم قايسەنوۆ, لەونيد بەدا, راقىمجان قوشقارباەۆ, ساعادات نۇرماعامبەتوۆ, سەرگەي لۋگانسكي ەسىمدەرى جەڭىس كىتابىنا التىن ارىپتەرمەن جازىلدى.
«كەڭەس وداعىنىڭ باتىرى «التىن جۇلدىز» ماراپاتىن العان قازاقستاندىقتاردىڭ ناقتى سانى – 528 ادام. الايدا, بارلىعى تەك سانمەن ولشەنبەسى انىق. ءومىرىن قۇربان ەتىپ, جۇزدەگەن مىڭ ادامنىڭ ءومىرىن ساقتاپ قالعان, بىراق ماراپاتتالماعان جاندار دا وتە كوپ», دەدى ايدا بالاەۆا.
مينيستر «تىزىمدە جوق» ءفيلمىن اتاپ ءوتىپ, وندا برەست قامالىن قورعاعان 3000 قازاقستاندىق تۋرالى باياندالعانىن ءسوز ەتتى.
«باسقا دا جاۋىنگەرلەرمەن بىرگە يىق تىرەسە شايقاسىپ, قامالدى قورعاعانداردىڭ قاتارىندا ساياسي جەتەكشىنىڭ ورىنباسارى قاسىم باتالوۆ, كىشى سەرجانت گريگوري بۋيانوۆ, اسكەري فەلدشەر ۆلاديمير دوتسەنكو, تانكيست قاسىم جارمەنوۆ, راديست عابباس جۇماتوۆ, ۆزۆود كومانديرىنىڭ ورىنباسارى نىعمەت ءىلياسوۆ, سەرجانت كوپەسباي يمامقۇلوۆ, ساياسي جەتەكشى مۇرتازا كارسلىەۆ, پۋلەمەتشى ەۆگەني كاچانوۆ, اۆتوماتشى سەرگەي لەبەدەۆ بار. برەست قالاسىنىڭ ۆوكزالى ماڭىندا 44-اتقىشتار پولكى شايقاسىپ, وندا ءبىزدىڭ ارىپتەسىمىز, «لەنينسكايا سمەنا» گازەتىنىڭ بۇرىنعى جاۋاپتى حاتشىسى پاۆەل گونچاروۆ ەرلىكپەن قازا تاپتى», دەدى مينيستر.
جاۋ باسىپ العان اۋماقتارداعى پارتيزاندىق قوزعالىسقا 3,5 مىڭنان استام قازاقستاندىق قاتىسسا, قازاقستان جەرىنەن اسكەرگە شاقىرىلعان 300-گە جۋىق سارباز فاشيستىك كونتسلاگەرلەردەن قاشىپ شىعىپ, يتاليا مەن فرانتسياداعى قارسىلاسۋ قوزعالىسىنىڭ قاتارىندا شايقاسقان.