الماتى كينوستۋدياسى مەن ەۆاكۋاتسيالانعان «موسفيلم» جانە «لەنفيلم» كينوستۋديالارى (1944 جىل ءوز مەكەندەرىنە قايتقان) نەگىزىندە كەيىننەن «قازاقفيلم» اتانعان شىعارماشىلىق ورتالىق قۇرىلىپ, 30 فيلم تۇسىرىلگەن ەكەن. بۇل تۋرالى مادەنيەت جانە اقپارات ءمينيسترى ايدا بالاەۆا «جەڭىستىڭ ەستەلىگى: ۇرپاقتار مەن حالىقتاردىڭ بىرلىگى» اتتى كونفەرەنتسيادا ايتتى, دەپ حابارلايدى Egemen.kz.
سول جىلدارى تۇسىرىلگەن فيلمدەر قاتارىندا – «دۆا بويتسا», «جدي مەنيا», «لەنينگرادتسى», «پارتيزانى», «باتىرى ستەپەي», «سىن بويتسا» جانە باسقا دا تۋىندىلار بار. فيلمدەرگە ميحايل جاروۆ, ليۋبوۆ ورلوۆا, نيكولاي چەركاسوۆ, مارينا لادىنينا سەكىلدى ايگىلى اكتەرلەر قاتىستى.
«سوعىس جىلدارى قازاقستان مادەنيەتى ءۇشىن ءوسۋ مەن ورلەۋدىڭ جاڭا كوكجيەكتەرىن اشتى. ەل ءىشىن شارپىعان بۇرىن-سوڭدى بولماعان پاتريوتتىق رۋح پەن بيىك ماقسات – قازاقتىڭ بەينەلەۋ جانە مۋزىكا ونەرىنىڭ, تەاترى مەن كينوسىنىڭ, پوەزياسى مەن ادەبيەتىنىڭ كەلبەتى مەن مازمۇنىن قالىپتاستىرعان باستى فاكتورلارعا اينالدى. ارينە, ءبىز – بۇگىنگى ۇرپاق – وسىنىڭ ءبارىن باعالاپ, قازىرگى ۇلتتىق مادەنيەتىمىزدىڭ قالىپتاسۋىنا اپاراتىن بىرەگەي تاريحي كەزەڭ رەتىندە قابىلداۋىمىز قاجەت», دەدى ا. بالاەۆا.
ايتا كەتسەك, 1943 جىلى «قازاقفيلمدە» رەجيسسەر ەفيم اروننىڭ «بەلايا روزا» اتتى ءفيلمى ءتۇسىرىلىپ, سول فيلمدە جارالى وفيتسەردىڭ ءرولىن شاكەن ايمانوۆ سومداعان. بۇگىندە «قازاقفيلم» ستۋدياسىنا وسى اڭىز ادام – اكتەر ءارى رەجيسسەر شاكەن ايمانوۆتىڭ ەسىمى بەرىلگەنى ءمالىم. الماتىدا ەۆاكۋاتسيادا جۇرگەن كەزىندە سەرگەي ەيزەنشتەين «يۆان گروزنىي» ءفيلمىنىڭ ءبىرىنشى ءبولىمىن اياقتاعان ەكەن.
كونفەرەنتسيا قاتىسۋشىلارى رەسەي مەن قازاقستان كينەماتوگرافيستەرىنىڭ سوعىس جىلدارىنداعى ىنتىماقتاستىعى بولاشاقتاعى بىرلەسكەن جوبالارعا نەگىز بولعانىن اتاپ ءوتتى.
ايتا كەتەلىك, ءىس-شاراعا قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ابزال نۇكەنوۆ, رەسەي فەدەراتسياسى پرەزيدەنتىنىڭ شەت ەلدەرمەن ايماقارالىق جانە مادەني بايلانىستار جونىندەگى باسقارماسى باسشىسىنىڭ ورىنباسارى انتون رىباكوۆ, رف-نىڭ جاستار ءىسى جونىندەگى فەدەرالدىق اگەنتتىگى باسشىسى گريگوري گۋروۆ, ەكى ەلدىڭ عالىمدارى, ساراپشىلارى جانە بەلسەندى جاستار قاتىستى.