2 ساۋىرگە قاراعان ءتۇنى ە.ا. بوكەتوۆ اتىنداعى قاراعاندى ۋنيۆەرسيتەتىنىڭ توعىز قاباتتى جاتاقحاناسىندا ءورت شىعىپ, 10 ستۋدەنت زارداپ شەكتى, دەپ حابارلايدى Egemen.kz.
ءوڭىردىڭ تجد ءباسپاسوز قىزمەتى مالىمەتىنشە, عيماراتتىڭ ءبىرىنشى قاباتىندا قوقىس جاشىگىندە 1,5 شارشى مەتر اۋماقتا قوقىس جانعان.
«تجد كۇشتەرى جاتاقحانادان ءتورت ادامدى قۇتقاردى. قۇتقارۋشىلاردىڭ ۇيلەسىمدى ارەكەتىنىڭ ارقاسىندا ءورت 19 مينۋت ىشىندە ءسوندىرىلدى. الدىن الا بولجام بويىنشا ءورتتىڭ سەبەبى – اشىق وت كوزى», دەپ حابارلادى تجد.
ءورتتىڭ اۋماعى ۇلكەن بولماعانىنا جانە قۇتقارۋشىلاردىڭ جەدەل جۇمىسىنا قاراماستان, زارداپ شەككەندەر بار. ون ستۋدەنت ح. ماقاجانوۆ اتىنداعى اۋرۋحاناعا جانە وبلىستىق بالالار كلينيكالىق اۋرۋحاناسىنا كەڭەيتىلگەن تەكسەرۋ ءۇشىن جەتكىزىلگەن.
«ولاردىڭ اۋرۋحاناعا تۇسكەن كەزدەگى جاعدايى تۇراقتى دەپ باعالاندى جانە قازىرگى ۋاقىتتا ناشارلاۋ جوق. قوسىمشا تەكسەرۋ جۇرگىزىلىپ جاتىر, سودان كەيىن امبۋلاتوريالىق ەمدەۋ تاعايىندالادى», دەپ حابارلادى قاراعاندى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.