كەلەلى ىستەر كەلىسىپ شەشىلەدى

اناتولي تاراسەنكو, وبلىستىق ۋكراين قوعامداستىعى كەڭەسىنىڭ توراعاسى. مەن قازاقستان پرەزيدەنتى ساي­لاۋىنىڭ الدىندا وتكەن قازاقستان حالقى اسسامبلەياسىنىڭ سەسسياسىنا دا, سايلاۋدان كەيىنگى ەلباسىن ۇلىقتاۋ راسىمىنە دە قاتىسۋ باقىتىنا يە بولدىم. اسسامبلەيا سەسسياسىندا ەلباسى نۇرسۇلتان نازارباەۆ جاساعان بايانداما ونىڭ سايلاۋالدى تۇعىرناماسى سەكىلدى بولدى. وندا ەلىمىزدىڭ باقۋاتتىلىعىن ارتتىرۋ, الەمدەگى مويىنى وزىق وتىز ەلدىڭ قاتارىنان كورىنۋ ءۇشىن الدا تۇرعان رەفورماتورلىق سيپاتى بار بەس باعدارلامانى ايتتى. بۇل قوعامدى جاڭعىرتۋ ءۇشىن رەۆوليۋتسيالىق باستاما بولاتىنى راس. نۇرسۇلتان ءابىش ۇلى 23 جىل بويى ەلدىڭ ەكونوميكاسىن, الەۋمەتتىك جاعدايىن دامىتىپ, قوعامدى قالىپتاستىرعانىمىزدى, ەندى ونى جاڭا ساپاداعى دەڭگەيگە كوتەرەتىنىمىزدى حالقىنىڭ الدىنا مىندەت ەتىپ قويدى. ەكونوميكا دامىماي قوعام دا دامىمايتىنى راس. ونى پرەزيدەنت شاعىن جانە ورتا بيزنەستى دامىتۋعا جۇكتەدى. سونىمەن قاتار, قوعام ادىلدىك سالتانات قۇر­عاندا عانا جاڭارادى, جاسانادى. ول سىبايلاس جەمقورلىقتى اۋىزدىقتاۋدى, ياعني بيلىك سالاسىنا رەفورما جاساۋدى تالاپ ەتەدى. قارا قىلدى قاق جاراتىن سوت قىز­مەتىن جولعا قويۋ دا جۇرتشىلىق كوڭىلىنەن شىقتى. وسى ىستەردى جۇزەگە اسىرۋ وڭاي شارۋا ەمەس. سوندىقتان ەلباسىنىڭ جاڭ­عىرتۋ جونىندەگى ۇلتتىق كوميسسيا قۇرۋ تۋرالى شەشىمىن مەن وتە قۇپتايمىن. ايتىل­عان دانالىق سوزگە ارەكەت بولماسا, ول ءسوز كۇيىنشە قالادى. كوميسسيا رەفورمالاردى جۇزەگە اسىرۋعا بىرلىگى مول قازاقستان حالقىن جۇمىلدىراتىن بولادى. مەن ونىڭ ءساتتى شىعارىنا سەنىمدىمىن. ويتكەنى, ەلباسىنىڭ دا, ەلىنىڭ دە تالاي اسۋدان وتكەن تاجىريبەسىنە, ىنتىماعىنا سەنەمىن. قوستاناي.