ونەرتاپقىشتار باسەكەسى

«Daryn First Championship» رەسپۋبليكالىق روبوتتەحنيكاسى فەستيۆالىندە توپ جارىپ, ورتالىق ازيا چەمپيوناتىندا ءوڭىرىمىزدىڭ نامىسىن قورعاعان قاراعاندىداعى «مۇراگەر» مامانداندىرىلعان مەكتەپ وقۋشىلارى ۇزدىك جوبالارىن تانىستىردى.

فەستيۆالعا قاتىسۋشى ورەن­دەردى وبلىس اكىمىنىڭ ورىنباسارى الىبەك الدەنەي قۇتتىقتاپ, ساتتىلىك تىلەدى.

– روبولەند فەستيۆالى نەبارى 10 جىلدىڭ ىشىندە 30 كوماندا, 70 ادام قاتىسقان كىشىگىرىم سايىستان بۇگىنگى تاڭدا حالىقارالىق دەڭگەيگە جەتتى. فەستيۆالدىڭ شىعارماشىلىق يدەيالار جارىققا شىعاتىن ۇلكەن الاڭعا اينالعانى – قاراعاندى ءوڭىرى ءۇشىن ۇلكەن مارتەبە. سىزدەردىڭ ارالارىڭىزدا ەلىمىزدىڭ تسيفرلىق الەۋەتىن ارتتىراتىن بىلىكتى جاس­تار بار ەكەنىنە سەنىمدىمىن. بۇگىنگى سايىس­تار جاڭا ءبىلىم الىپ, ەرەكشە پىكىر الماسۋلارعا جەتەلەيتىن جاقسى ورتا قۇرۋعا زور مۇمكىندىك بەرەدى, – دەدى الىبەك الدەنەي.

بۇعان دەيىنگى وتكەن توعىز فەس­تيۆالعا يتاليا, سەربيا, گرەكيا, پولشا, گرۋزيا, ازەربايجان, قىرعىزستان, وزبەكستان جانە ەلىمىزدەن جەتى مىڭعا جۋىق كوماندا قاتىسىپتى. جالپى, 12 مىڭنان اسا قاتىسۋشى وزدەرىنىڭ ۇزدىك جوبا­لارىن قورعاعان.

مۇنىمەن قوسا فەستيۆال جىلدا ءۇش مىڭنان استام كورەرمەن جيناپ, جارىس ونلاين ترانسلياتسيا ارقىلى دا تاراتىلعان. وسىلايشا, ون جىل ىشىندە فەس­تي­ۆال ءوز اۋقىمىن كەڭەيتىپ, حا­لىقارالىق دەڭگەيدەگى تاجىريبە الماسۋ الاڭىنا اينالىپ ۇلگەردى.

جارىستىڭ دەڭگەيى ارتقان سا­يىن قاتىسۋشىلار سانى دا كوبەيىپ كەلەدى. بيىلعى فەستيۆالعا 362 ­كوماندادان تۇراتىن 750 قاتىسۋ­شى باق سىنادى. چەمپيوناتتا «كەگەل­رينگ», «لابيرينت», «كۆاد­رو­كوپ­تەرلەردى مانەۆرلەۋ», «شى­عار­ماشىلىق سانات» سەكىلدى بەلگىلى باعىتتار بار.

– «RoboLand» – ەلىمىزدەگى ءبىلىم روبوتتەحنيكاسى بويىنشا ەڭ العاشقى ءىرى جوبا ءارى تەحنيكالىق شىعارماشىلىق پەن جاڭا تەحنو­لو­گيا­لاردىڭ اۋقىمدى فورۋمىنا­ اينالدى. بۇل چەمپيو­نات – جاس ينجەنەرلەر مەن كونسترۋك­تورلار ءۇشىن تاجىريبە الماسۋ الاڭى عانا ەمەس, سونىمەن قاتار ءبىلىم بەرۋ روبوتتەحنيكاسىنىڭ وزەكتى ماسەلەلەرىن تالقىلاۋعا ارنالعان اشىق ديالوگتى پلاتفورما, – دەيدى فەستيۆالدىڭ باس تورەشىسى ەسبول ءارىنوۆ.

بولگاريانىڭ ۆارنا قالاسىنان كەل­گەن سەرگەي سمىنتىنانىڭ شا­كىرت­تەرى 9-13 جاس ارالىعىنداعى با­لالار لابيرينتتەرى بايقاۋىنا قاتىستى.

– قازاقستاندا وسىنداي اۋقىم­دى چەمپيوناتتار ءوتىپ جات­قا­نىن بىلمەدىك. فەستيۆال جوعارى دەڭگەيدە ءوتتى. مۇنداي حالىق­ارا­لىق كەزدەسۋدى ءوز كوزىمىزبەن كورۋگە, تاجىريبە جيناۋعا, ءوزىمىزدى كورسەتۋگە كەلدىك. ويتكەنى بىزدە قالىپتاسقان روبوتتەحنيكا جانە باعدارلامالاۋ مەكتەبى بار, – دەدى سەرگەي سمىنتىنا.

ال يران ۇلتتىق كومان­داسىنىڭ جەتەكشىسى نادەر نوباحت: «روبوت­­تەحنيكانى وقىتۋدىڭ جاڭا جولدارىن پايدالانۋدىڭ ماڭىز­دىلىعى» تاقىرىبىندا بايانداما جاسادىم. جالپى, يراندا روبوتتەحنيكا جاقسى جولعا قويىلعان. بۇل ءبىزدىڭ ەلدەگى تەگەران ۋنيۆەر­سيتە­تىمەن تىعىز بايلانىستى. مەك­تەپ­تەرىمىزدە روبوتتەحنيكا ءپان رەتىندە وقىلاتىندىقتان ۇزدىك وقۋ­شى­لارىمىز مالايزيا, قىتاي ەلدە­رىندە وتەتىن جارىستارعا ءجيى قاتى­سادى. بيىلعى قاراعاندى فەس­تي­ۆالىنە «شىعارماشىلىق سانات» بويىنشا قاۋىپسىزدىك جوبا­سىن ۇسىناتىن 9 قاتىسۋشى كەلدى. ءار­تۇرلى روبوت تۇرلەرىن پايدالانىپ, ءورت­تىڭ الدىن الۋعا باعىتتالعان جوبالار ۇسىندىق», دەيدى.

سونىمەن ەكى كۇن بويى وتكەن روبوتتەحنيكا چەمپيوناتىندا قاراعاندى وبلىسى تاعى دا جوعارى ناتيجە كورسەتتى. ءوڭىر كوماندالارى جالپىكوماندالىق ەسەپتە ءبىرىنشى ورىندى يەلەنسە, قوستاناي وبلىسىنىڭ وكىلدەرى ەكىنشى ورىن, وزبەكستاننان كەلگەن قاتى­سۋشىلار ءۇشىنشى ورىن الدى.

فەستيۆال اياسىندا ءداستۇرلى «قاراعاندىلىق كەزدەسۋلەر» ءوتتى. بيىلعى پىكىرتالاس ء«بىلىم بەرۋدى تسيفرلىق ترانسفورماتسيالاۋ: ترەندتەر مەن پەرسپەكتيۆالار» تاقىرىبى اياسىندا ءوربىدى. وندا جەتەكشى ساراپشىلار وقۋ جۇيەسىنە تسيفرلىق تەحنولوگيالاردى ەنگىزۋدى تالقىلاپ, STEM-ءبىلىم بەرۋدى دامىتۋ بويىنشا تاجىريبە الماستى.

جاس ونەرتاپ­قىش­تار چەمپيو­ناتتان سوڭ س.ساپيەۆ اتىنداعى بوكس ورتا­لىعىندا وتكەن «RoboLand Party» ويىن-ساۋىق باعدارلاماسىن ىقى­لاس­پەن تاماشالادى.

فەستيۆالدى «Kazdidac» قاۋىم­داستىعى ۇيىمداستىردى. باس دەمەۋ­شى – «بازيستىك دۇكەن» جشس, رەسمي دەمەۋشىلەر – DIGIS AV پەن رەگيون 715 كومپانيالارى.

قاراعاندى وبلىسى