استانا. 11 اقپان. رەسەيدىڭ اتاقتى جەڭىل اتلەتى, ەكى وليمپيالىق ويىنداردىڭ چەمپيونى ەلەنا يسينباەۆا ۋادە بەرگەنىندەي, ءبىرشاما ۋاقىت ۇزىلىستەن كەيىن سپورتقا قايتىپ ورالدى. بۇل تۋرالى «ارگۋمەنتى ي فاكتى» حابارلادى.
تسسكا سپورت كلۋبىنىڭ ءباسپاسوز قىزمەتى مالىمدەگەندەي, سىرىقپەن سەكىرۋشى ەلەنا يسينباەۆا 12 اقپان كۇنى ءوزىنىڭ سپورتقا ورالعانىن رەسمي حابارلايدى دا, تسسكا جەڭىل اتلەتتەرى كومانداسىنا سپورتشى-نۇسقاۋشى لاۋازىمى بويىنشا جۇمىسقا قابىلدانادى. قازىر جاسى 32-گە كەلىپ وتىرعان اتلەتتىڭ باستى ماقساتى 2016 جىلى وتەتىن ريو-دە-جانەيرو وليمپيالىق ويىندارىنا قاتىسۋ بولىپ وتىرعانىن دا ءبىلۋ قيىن ەمەس. ول برازيليادا ءۇشىنشى مارتە وليمپيادا چەمپيونى بولۋدى ارماندايدى.
ەلەنا يسينباەۆا وسىنىڭ الدىندا سوڭعى رەت, 2013 جىلى ماسكەۋدە وتكەن الەم چەمپيوناتىندا سايىسقا تۇسكەن ەدى. سوندا 4 مەتر 89 سانتيمەتردىڭ ارعى جاعىنان اسىپ وتكەن سپورتشى 15 مينۋتتان سوڭ وتكەن ءباسپاسوز ءماسليحاتىندا ءوزىنىڭ كاسىبي مانسابىندا ءۇزىلىس جاساعالى تۇرعانىن, بىراق مىندەتتى تۇردە قايتا ورالاتىنىن ايتقان. ال ءۇزىلىستى وتباسىلىق ىستەرگە ارنايتىنىن جەتكىزگەن.
ەلەنا يسينباەۆا 1982 جىلعى 3 ماۋسىمدا ۆولگوگراد قالاسىندا تۋعان. سىرىقپەن سەكىرۋدە الەمنىڭ 29 رەكوردىن جاساعان. اكەسى گادجي گافانوۆيچ, ۇلتى تاباساران, اناسى ناتاليا پەتروۆنا, ۇلتى ورىس, ەكەۋى دە قاراپايىم كاسىپتىڭ ادامدارى بولعان.
2014 جىلعى 28 شىلدەدە ەلەنا قىز تۋدى. سودان بەرى بالا كۇتىمىمەن وتىردى. ال سول جىلعى قازان ايىندا نيكيتا ەسىمدى ورىس جىگىتىنە كۇيەۋگە شىقتى.
دامير قوجامقۇل.