بيىل اقمولا وبلىسىندا اۋىل شارۋاشىلىعى داقىلدارىنىڭ ەگىس القابى 5,4 ملن گەكتاردان اسادى, بۇل 2024 جىلمەن سالىستىرعاندا 48,1 مىڭ گەكتارعا كوپ, دەپ حابارلايدى Egemen.kz.
مايلى داقىلداردىڭ القابى – 161 مىڭ گەكتارعا ارتىپ, 2025 جىلى 430 مىڭ گەكتاردى قۇرايدى. سونداي-اق, كارتوپ پەن كوكونىس ەگىستىگى كەڭەيتىلدى. ال, مال ازىعى داقىلدارىنىڭ القابى 2024 جىلعى دەڭگەيدە ساقتالدى – 416 مىڭ گەكتار.
تۇقىم دايىنداۋ جۇمىستارى تولىق اياقتالدى. 540,2 مىڭ توننا تۇقىمنىڭ 444,4 مىڭ تونناسى (جوسپارلانعان كولەمنىڭ 82,3%) تەكسەرىلگەن.
بۇدان بولەك, مينەرالدى تىڭايتقىش ەنگىزىلەتىن القاپ 78 مىڭ گەكتارعا ۇلعايتىلماق. وتاندىق وندىرۋشىلەرمەن 66,9 مىڭ توننا تىڭايتقىش جەتكىزۋگە 266 كەلىسىمشارت جاسالعان.
تەحنيكا دايىندىق دەڭگەيى 100%-دى قۇرايدى. ەگىس جۇمىستارىنا 37 مىڭ بىرلىك تەحنيكا جۇمىلدىرىلادى.
اۋىل شارۋاشىلىعى مينيسترلىگىنىڭ مالىمەتىنشە كوكتەمگى دالا جۇمىستارىنا 82,9 مىڭ توننا جەڭىلدەتىلگەن ديزەل وتىنى ءبولىندى. بيىل اقپان-ناۋرىز ايلارىندا اۋىل شارۋاشىلىعى تاۋارىن وندىرۋشىلەر ءۇشىن وتىننىڭ باعاسى ليترىنە 254 تەڭگەنى قۇرادى, بۇل نارىقتىق باعادان 15%-عا تومەن.
ۇكىمەتتىڭ قولداۋىنىڭ ارقاسىندا كوكتەمگى ەگىس جۇمىستارى ءۇشىن ەرتە قارجىلاندىرۋ قامتاماسىز ەتىلدى. «كەڭ دالا» باعدارلاماسى شەڭبەرىندە جەڭىلدەتىلگەن نەسيە الۋ ءۇشىن جالپى سوماسى 96,5 ملرد تەڭگەگە 606 ءوتىنىم ءتۇستى, ونىڭ ىشىندە 65,9 ملرد تەڭگەنى قۇرايتىن 413 ءوتىنىم ماقۇلدانىپ, قارجىلاندىرۋ كەزەڭىندە تۇر.