بەيبىتشىلىك جانە كەلىسىم سارايىندا, مادەنيەت جانە اقپارات مينيسترلىگىنىڭ ۇيىمداستىرۋىمەن «ۇلتتىق قۇندىلىقتار: سالتتىڭ سىرلى بەينەسى» اتتى رەسپۋبليكالىق شىعارماشىلىق بايقاۋىنىڭ جەڭىمپازدارىن سالتاناتتى ماراپاتتاۋ ءراسىمى ءوتتى, دەپ حابارلايدى Egemen.kz.
ءىس-شارانىڭ نەگىزگى ماقساتى – بەينەلەۋ ونەرى ارقىلى ۇلتتىق قۇندىلىقتار مەن مادەني نىسانداردى ناسيحاتتاۋ, سونداي-اق وتاندىق سۋرەتشىلەردىڭ شىعارماشىلىعىن قولداۋ جانە پاتريوتتىق رۋح پەن ۇلتتىق بىرەگەيلىكتى قالىپتاستىرۋ.
بايقاۋعا قازاقستان وڭىرلەرىنەن 137 كاسىبي سۋرەتشى قاتىستى. ولار قازاقتىڭ مادەني قۇندىلىقتارىن شەبەر بەينەلەپ, ءوز ەڭبەكتەرىن پەيزاج, ناتيۋرمورت جانە سيۋجەتتى كارتينا جانرلارىندا ۇسىندى.
بايقاۋ قورىتىندىسىنا سايكەس قازاقتىڭ سالت-داستۇرلەرى مەن ادەت-عۇرىپتارىنا ەرەكشە كوركەمدىك كوزقاراس بەينەلەنگەن ۇزدىك جۇمىستار تاڭدالدى. بۇل تۋىندىلار زاماناۋي كوركەمدىك تەحنيكالار مەن ءداستۇرلى موتيۆتەردى ۇيلەستىرىپ, ۇلتتىق مۇرانى جاڭاشا پايىمدايدى.
مادەنيەت جانە اقپارات ۆيتسە-ءمينيسترى ايبەك سىدىقوۆ بارلىق قاتىسۋشىلار مەن قوناقتارعا العىس ءبىلدىرىپ, ۇلتتىق بولمىستى ونەر ارقىلى ساقتاپ, ناسيحاتتاۋدىڭ ماڭىزىن اتاپ ءوتتى. ول مۇنداي باستامالار سۋرەتشىلەردىڭ شىعارماشىلىعىن جاڭا دەڭگەيگە كوتەرۋگە, قوعامعا ەلدىڭ باي مادەني مۇراسىن تەرەڭنەن تانىتۋعا مۇمكىندىك بەرەتىنىن ايتتى.
«بۇل بايقاۋ – سۋرەتشىلەردىڭ شەبەرلىگىن تانىتاتىن ونەر دوداسى عانا ەمەس, ەڭ الدىمەن ۇلتتىق ونەردىڭ كوكجيەگىن كەڭەيتەتىن ماڭىزدى قادام.
وسىنداي باستامالار ارقىلى ءبىز ءتول مادەنيەتىمىزدى زامان تالابىنا ساي جاڭعىرتىپ, سۋرەتشىلەرگە قولداۋ كورسەتىپ, ولاردىڭ شىعارماشىلىعىن جاڭا دەڭگەيگە كوتەرۋگە مۇمكىندىك بەرەمىز.
بايقاۋعا قاتىسقان بارلىق سۋرەتشىلەرگە حالقىمىزدىڭ باي مادەنيەتىن, سالت-ءداستۇرىن, بابالار اماناتىن ونەر تىلىمەن ورنەكتەپ, ەل رۋحانياتىن بايىتۋعا قوسقان زور ۇلەستەرى ءۇشىن ەرەكشە العىس بىلدىرەمىز», دەدى ۆيتسە-مينيستر.
سونىمەن بايقاۋ جەڭىمپازدارى كەلەسى جۇلدەلى ورىندارعا يە بولدى:گران-پري – ورالبەك قابوكە ء«ومىر ەسىگى»;I ورىن – قامي ايتقاليەۆ «اس»;II ورىن – ءۇمىت جۇبانىشەۆا «7 كۇلشە»;III ورىن – اسەت جاقىپبەك «اق كۇيمە».
بايقاۋ اياسىندا قازاق حالقىنىڭ ۇلتتىق قۇندىلىقتارىن جان-جاقتى كورسەتەتىن كورمە اشىلدى. قوناقتار قازاق حالقىنىڭ داستۇرلەرى, تۇرمىسى مەن فيلوسوفياسىنىڭ زاماناۋي كورىنىسىن تاماشالاي الادى. كورمە ەكى اي بويى جۇمىس ىستەيدى.