ەڭبەك جانە حالىقتى الەۋمەتتىك قورعاۋ مينيسترلىگى بيىلعى بيزنەستىڭ الەۋمەتتىك جاۋاپكەرشىلىگىنە ارنالعان بايقاۋ باستالعانىن حابارلادى, دەپ جازادى Egemen.kz.
بايقاۋ وڭىرلىك جانە رەسپۋبليكالىق ەكى كەزەڭنەن تۇرادى. شاعىن, ورتا جانە ءىرى كاسىپكەرلىك سۋبەكتىلەرى «پارىز-2025» بايقاۋىندا 4 اتالىمدا «ۇزدىك الەۋمەتتىك جاۋاپتى كاسىپورىن», «ەڭبەكتى قورعاۋ سالاسىنداعى ۇزدىك كاسىپورىن», «ۇزدىك ۇجىمدىق شارت», «ەكولوگياعا قوسقان ۇلەسى ءۇشىن» بويىنشا ءوزارا ۇزدىكتى انىقتايدى. سونداي-اق بايقاۋ اياسىندا «جىلدىڭ ۇزدىك الەۋمەتتىك جوباسى» ارنايى سىيلىعى تابىستالادى.
بايقاۋعا قاتىسۋ تەگىن. ۇمىتكەرلەر ءوز ماتەريالدارىن قاعاز تۇرىندە جانە ەلەكتروندى فورماتتا وبلىستاردىڭ, رەسپۋبليكالىق ماڭىزى بار قالالاردىڭ جەرگىلىكتى اتقارۋشى ورگاندارىنا جولداۋ كەرەك.
بايقاۋعا قاتىستى وزگە اقپاراتتى ءبىلۋ ءۇشىن وبلىستاردىڭ, استانا, الماتى جانە شىمكەنت قالالارىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا نەمەسە ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك ەڭبەك ينسپەكتسياسى كوميتەتىنىڭ وڭىرلىك دەپارتامەنتتەرىنە حابارلاسۋعا بولادى.