بۇگىن, 30 ناۋرىزدا كۇللى مۇسىلمان قاۋىم ورازا ايت مەيرامىن تويلايدى, دەپ حابارلايدى Egemen.kz.
وتىز كۇن ورازا تۇتقان ادامدار بۇل كۇنى ايت نامازى وقىلعاننان كەيىن ءبىر-ءبىرىنىڭ ۇيىنە ايتشىلاپ, اق داستارحاننان ءدام تاتىپ, مەرەكەلەيدى.
شاريعاتتا قاسيەتتى رامازان ايى اياقتالعاننان كەيىن تۋاتىن ءشاۋال ايىنىڭ ءبىرىنشى كۇنى – ورازا ايت مەرەكەسى. نەگىزى ورازا ايتتى مۇسىلماندار ءبىر كۇن عانا اتاپ وتكەن, الايدا ەل ىشىندە ونى ءۇش كۇن قاتارىنان تويلاۋ ءداستۇرى ەجەلدەن قالىپتاسقان. ورازا ايتتا نە ىستەۋ كەرەك؟ قانداي امالدار اتقارعان ابزال؟
ەڭ الدىمەن ساۋابى مول ءىستىڭ ءبىرى – ءپىتىر ساداقاسىن بەرۋ. نەگىزى, ول رامان ايىنىڭ ءبىرىنشى كۇنىنەن باستاپ ايت نامازىنا دەيىنگى ارالىقتا بەرىلۋى قاجەت. ەگەر كىمدە-كىم ءپىتىردى بەرمەگەن بولسا ايت نامازى وقىلعانعا دەيىن ۇلگەرگەنى ابزال, ودان كەيىن بەرىلسە ول تەك جاي ساداقا بولىپ ەسەپتەلەدى. ناماز بىتكەن سوڭ مۇسىلماندار ءبىر-بىرىمەن ءتوس قاعىسىپ, ايت مەرەكەسىمەن قۇتتىقتايدى, جاقسى تىلەكتەرىن ايتادى.
سونىمەن قاتار يسلام عۇلامالارى بۇل كۇنى اللاعا سانسىز ماداق ايتىپ, ايت نامازىن وقۋدىڭ ارتىقشىلىقتارى تۋرالى ايتادى. جاراتقانعا تاكبىر ايتۋ دىندە زاڭداستىرىلعان امالداردىڭ قاتارىنان سانالسا, ايت نامازىن وقۋ ء–ۋاجىپ.
ابزال امالداردىڭ تاعى ءبىرى – نامازعا شىعار الدىندا قۇرما جەپ شىعۋ. بۇل –سۇننەت امال جانە وتىز كۇن ورازانىڭ اياقتالىپ, ايت مەرەكەسىنىڭ باستالعانىن بىلدىرەدى.
ايت كۇنى مەيرام بولعاندىقتان مۇسىلمان بالاسى ۇيدەن شىعار كەزدە ۇستىنە جاڭا نەمەسە تازا كيىمىن كيىپ, اتىرلەنىپ, عۇسىل قۇيىنعانى ءجون دەسەدى.
ءبىر-بىرىمەن ارقا-جارقا بولىپ قاۋىشىپ, سىيلىق ۇلەستىرىپ, قايىرىمدى ءىس اتقارۋ, مۇقتاج جاندارعا كومەكتەسۋ دە ايت مەرەكەسىنىڭ ساۋابى مول بۇزىلماي كەلە جاتقان ءداستۇرى. ءۇي-ءۇيدى ارالاپ ايتشىلاپ, اق داستارحاننان ءدام تاتۋ دا جۇلگەسى ۇزىلمەگەن جۇيەلى امالداردىڭ ءبىرى. بۇل كۇنى اۋىز بەكىتۋگە بولمايدى. قازا بولعان كۇندەردىڭ ورازاسى ايتتان كەيىن وتەلەدى.
مىنە, ورازا ايت مەيرامىندا مۇسىلمان قاۋىمى وسىنداي امال-قۇلشىلىقتار ىستەپ, ءبىر جاعىنان جاراتقانعا عيبادات جاساسا, ەكىنشى جاعىنان ءوزارا سىيلاستىق پەن جاقسى قارىم-قاتىناستى نىعايتۋعا ارەكەت ەتەدى. ورازا ايتتىڭ ەرەكشەلىگى دە وسىندا جاتىر.