مەملەكەت باسشىسىنىڭ الماتىداعى رەزيدەنتسياسىندا قازاقستان مەن وزبەكستان پرەزيدەنتتەرىنىڭ بەيرەسمي كەزدەسۋى ءوتتى, دەپ حابارلايدى Egemen.kz.
قاسىم-جومارت توقاەۆ مارتەبەلى مەيماننىڭ الماتىعا ساپارمەن كەلگەنىنە ريزاشىلىق ءبىلدىرىپ, مۇنداي بەيرەسمي كەزدەسۋلەر جاقسى داستۇرگە اينالعانىن ايتتى.
– بۇل – باۋىرلاس, دوستاس مەملەكەتتەر اراسىنداعى ىنتىماقتاستىقتى دامىتۋ ماقساتىندا اتقارىلىپ جاتقان جۇمىستى ىسكەرلىك سيپاتتا تاعى ءبىر تالقىلاۋعا ورايلى ءسات. ءبىز – وداقتاس ەلدەرمىز. ەكى ەل اراسىنداعى ىقپالداستىق تۇتاس ورتالىق ازيا وڭىرىندەگى جاعدايعا تىكەلەي اسەر ەتەدى, – دەدى قازاقستان پرەزيدەنتى.
مەملەكەت باسشىسى باۋىرلاس حالىقتاردى جاقىنداستىرۋعا, ايماقتىڭ ورنىقتى جانە قاۋىپسىز دامۋىنداعى ورتاق ماقساتتاردى ىلگەرىلەتۋگە شاۆكات ميرزيوەۆتىڭ زور ۇلەس قوسقانىن اتاپ ءوتتى.
– قازاقستاندىقتار ءسىزدى جاقسى تانيدى جانە اسا قۇرمەتتەيدى. ءسىزدىڭ مىقتى ءارى ابىرويلى كوشباسشىلىعىڭىزدىڭ ارقاسىندا وزبەكستان قارقىندى دامىپ كەلەدى. وتكەن جىلى وزبەك ەكونوميكاسىنىڭ ءوسىمى 6 پايىزدان اسقانىن بىلەمىز. ەكونوميكانىڭ بارلىق سەكتورىنداعى ماقساتتى كورسەتكىشتەر جوسپارعا ساي اتقارىلىپ جاتىر. وزبەكستان نەعۇرلىم تابىستى دامىعان سايىن, ءبىزدىڭ ەلدەرىمىز اراسىنداعى ساۋدا-ەكونوميكالىق ىنتىماقتاستىق تا سوعۇرلىم ساپالى بولادى. سوندىقتان بۇگىنگى كەزدەسۋدە ناقتى ماسەلەلەر بويىنشا پىكىر الماسامىز دەپ ويلايمىن, – دەدى قاسىم-جومارت توقاەۆ.
ءوز كەزەگىندە وزبەكستان پرەزيدەنتى ەكىجاقتى بايلانىستاردى نىعايتۋدى كوزدەيتىن بۇگىنگى كەزدەسۋدىڭ ماڭىزىنا توقتالدى.
– مەنى ءوزىڭىزدىڭ تۋعان جەرىڭىز, اتاپ ايتقاندا, الماتى قالاسىندا دوستىق پەيىلمەن, ەكى حالىقتىڭ داستۇرىنە ساي ىلتيپاتپەن قارسى الىپ جاتقانىڭىزعا راقمەت. ءوزىمنىڭ جانە حالقىمنىڭ اتىنان ريزاشىلىعىمدى بىلدىرەمىن. سوڭعى جىلدارى قارىم-قاتىناسىمىز مۇلدەم جاڭا دەڭگەيگە كوتەرىلدى. ءبىز – وداقتاسپىز. ءوزارا سىيلاستىعىمىزدىڭ ارقاسىندا كوپتەگەن ماسەلە شەشىمىن تاۋىپ كەلەدى, ەكەۋارا ۋاعدالاستىقتاردىڭ بارلىعى ىسكە اسىرىلىپ جاتىر. ناقتى ناتيجەلەر بار. ءسىزدى قازاقستاننىڭ زور تابىستارعا جەتۋىمەن قۇتتىقتايمىن. ەكونوميكالارىڭىز دامىپ كەلەدى, جەتىستىكتەرىڭىز جوعارى. ءبىرىنشى توقساندى 5,4 پايىزبەن قورىتىندىلاپ وتىرسىزدار. بۇگىنگى كەزدەسۋىمىزدىڭ سيپاتى رەسمي بولماسا دا, مەن ۇلكەن قۇراممەن كەلدىم. دەگەنمەن ءاربىر وسىنداي بەيرەسمي جۇزدەسۋلەر ءبىزدىڭ بايلانىستارىمىزعا, بارلىق كەلىسىمدەرىمىزدىڭ ورىندالۋىنا تىڭ سەرپىن بەرەدى, – دەدى شاۆكات ميرزيوەۆ.
تاراپتار ساياسي, ساۋدا-ەكونوميكالىق, كولىك-لوگيستيكالىق, ينۆەستيتسيالىق, ەنەرگەتيكالىق, سۋ شارۋاشىلىعى, ونەركاسىپ كووپەراتسياسى جانە تۋريزم سالالارىنداعى ءوزارا ىقپالداستىقتىڭ پەرسپەكتيۆاسىن جان-جاقتى تالقىلادى. مادەني-گۋمانيتارلىق بايلانىستاردى دامىتۋعا ەرەكشە نازار اۋدارىلدى.
سونىمەن قاتار وڭىرلىك جانە حالىقارالىق كۇن ءتارتىبىنىڭ وزەكتى ماسەلەلەرى قاراستىرىلدى.
كەزدەسۋ سوڭىندا پرەزيدەنتتەر قازاق-وزبەك ستراتەگيالىق سەرىكتەستىگىن ودان ءارى تەرەڭدەتۋگە بەيىل ەكەنىن راستادى.