قازاقستان حالقى اسسامبلەياسىنىڭ 20 جىلدىق مەرەيتويىنا ارنالعان ءححىى سەسسياسى ەلىمىزدىڭ ەرتەڭى ەرەك ەكەنىن سارالاپ بەردى. وندا تاعدىرىن ءوز قولىنا العان قازاقستاندىقتاردىڭ قانداي قيىنشىلىق تۋىنداسا دا بىرلىك پەن تاتۋلىقتىڭ ارقاسىندا بۇكىل الەم قۇرمەتتەيتىن بۇگىنگى جانە كەلەشەك ۇرپاق ءۇشىن جاسالعان زور بيىككە جەتكەنىمىز بايان ەتىلىپ, كوپ ۇلتتى حالقىمىزدىڭ ءبىرتۇتاس, توپتاسقان حالىققا بىرىگە العانىمىز – ارتىقشىلىعىمىز ەكەندىگى سەنىم تۋعىزادى. ءبىزدىڭ كۇشىمىز وسىندا. سونىڭ ءبىر كورىنىسى رەتىندە ەلباسى قازاق ءتىلىن ۇيرەنىپ جۇرگەندەرگە العىس بىلدىرە كەلىپ, مەملەكەتتىك ءتىلدىڭ دامۋى ارقاشاندا ماڭىزدى ەكەنىن ايتتى.
بۇل ورايدا بارشا ۇلت وكىلىن باۋىرىنا باسقان تۇعىرى بيىك ەلىمىز وسى تاتۋلىق پەن كەلىسىمنىڭ ارقاسىندا ءالى تالاي اسقارالى بەلەستەردى باعىندىرارى ءسوزسىز. تەك سول ماقساتقا جەتۋ تىلەگى مەن جۇرەگى ءبىر بەرەكەلى حالىقتىڭ ەنشىسىندە دەيمىز. سونىڭ ءبىر جارقىن مىسالى رەتىندە «مەملەكەتتىك ءتىلدى جوعارى قۇرمەتتەۋ – سول ءتىلدى جان قۇشتارلىعىمەن ۇيرەنۋدەن باستالادى» دەگەن قاعيدانى استانا قالاسى ءىىد «سارىارقا» اۋداندىق ءىىب پوليتسەيى نيكولاي جگۋن دە بەرىك ۇستانىپتى.
مەملەكەتتىك ءتىلدى جەتىك ءبىلۋدى ومىردەگى ۇلكەن جەتىستىك دەپ تۇسىنەتىن نيكولاي اقمولا وبلىسى, قورعالجىن اۋدانىندا وقۋشى بولىپ جۇرگەن كەزىندە-اق قازاقتىڭ ءتول اقىنى ابايدىڭ شىعارمالارىن تۇپنۇسقادا وقىعان ەكەن. سونىڭ ارقاسىندا قازاق حالقىنىڭ ءداستۇرى مەن سالتىن, مادەنيەتىن كەڭىنەن تانىعان. ەندى, مىنە, ول سەگىز جىلدان استام ۋاقىت بويى قۇقىق قورعاۋ ورگاندارىندا قىزمەت ەتىپ كەلەدى. وسى جىلدارى كوپ نارسە وزگەردى. نيكولاي شاڭىراق كوتەردى. ينتەرناتسيونالدى وتباسى اتاندى. قازاق ءتىلىن قازاقتان ارتىق ءبىلۋدىڭ ارقاسىندا شىعار, ونىڭ جۇبايى دا قازاقتىڭ قىزى – جاننا. ول دا قۇقىق قورعاۋ ورگانى قاتارىندا ابىرويلى ەڭبەك ەتىپ, جول-پاترۋلدىك پوليتسيا شتابىنىڭ اعا ينسپەكتورى, پوليتسيا كاپيتانى. ولاردىڭ يسلام اتتى 6 جاسار ۇلى, يلانا اتتى 3 جاسار قىزى جانە 9 ايلىق يمران اتتى تاعى ءبىر ۇلدارى بار. جوعارىدا ايتىلعانداي, يسلام مەن يلانا قازاق بالاباقشاسىندا تاربيەلەنۋدە. قازاق ءتىلىن مەڭگەرۋدى ءاربىر قازاقستاندىقتىڭ قاسيەتتى پارىزى دەپ ساناعاندىقتان, بالالارىن ءبۇلدىرشىن كەزىنەن مەملەكەتتىك تىلگە باۋلىعاندى ءجون كورەدى. ءتىلدى قۇرمەت تۇتۋمەن قاتار, حالقىمىزدىڭ ءداستۇرىن جوعارى باعالايدى.
– قوعاممەن ارالاسۋدا مەملەكەتتىك ءتىلدى جەتىك بىلگەن ءجون. ويتكەنى, قوعامدىق ءتارتىپتى قورعاۋ – جاۋاپتى ءىس. كومەك سۇراپ تالاي ازاماتتار جولىعىپ جاتادى. مەن ولارمەن قازاق ءتىلىندە تىلدەسكەنىمدە, ولاردىڭ كەيبىرەۋلەرى قازاق ءتىلىن قايدان بىلەتىنىمدى سۇرايدى. مەن قازاقستان ازاماتىمىن, ءوز ەلىمنىڭ ءتىلىن بىلمەسەم ۇيات ەمەس پە دەپ جاۋاپ قايتارامىن», دەيدى نيكولاي. ءيا, ءتىل بىلگەننىڭ ءورىسى كەڭ دەگەن وسى.
الەكساندر تاسبولاتوۆ,
«ەگەمەن قازاقستان».