قازاقستان ۇلتتىق اكادەميالىق كىتاپحاناسىندا «قۇسنيحات: ورتالىق ازياداعى يسلام كالليگرافياسى» اتتى كورمە ءوتتى. كورمەنى ۇيىمداستىرۋعا پارلامەنت سەناتى قولداۋ ءبىلدىرىپ, مۇسىلمان اقساقالدار كەڭەسى ورتالىق ازيا كەڭسەسى ۇيىتقى بولعان دەپ جازادى Egemen.kz.
كورمە ورتالىق ازياداعى يسلام كالليگرافياسىنىڭ تاريحي جانە رۋحاني مۇراسىن ناسيحاتتاۋعا باعىتتالعان.
كورمەنىڭ سالتاناتتى اشىلۋىنا سەنات دەپۋتاتتارى, عالىمدار, زيالى قاۋىم وكىلدەرى جانە كالليگرافيا شەبەرلەرى قاتىستى. قوناقتار كونە جازۋ ونەرىنىڭ ءتۇرلى سيپاتىمەن تانىستى جانە ونىڭ ءمان-ماڭىزىن باعالادى. كونفەرەنتسيا اياسىندا تۇركيالىق پروفەسسور مەتين اكار مەن وزبەكستاندىق كالليگرافيا شەبەرى حابيبوللا ساليەۆ بايانداما جاساپ, وسى ونەر ءتۇرىنىڭ ەرەكشەلىكتەرى تۋرالى ايتىپ بەردى. سونىمەن قاتار, ۇلتتىق قولجازبالار جانە سيرەك كىتاپتار ورتالىعىندا شەبەرلىك ساباقتارى وتكىزىلدى.
«قۇسنيحات – يسلام مادەنيەتىنىڭ ماڭىزدى قۇرامداس بولىگى. بۇل كورمە مەن كونفەرەنتسيا ونەردىڭ دامۋىنا ىقپال ەتەدى. كالليگرافيا – عاسىرلار بويى قالىپتاسقان ونەر مەن رۋحانياتتىڭ ايناسى. ول تەك ەستەتيكالىق سۇلۋلىق كورىنىسى عانا ەمەس, تاريحى تەرەڭ رۋحاني ءمانى بار. بۇگىن ءبىز بۇل قۇندى مۇرانى ساقتاپ, كەلەشەك ۇرپاققا جەتكىزۋ جونىندەگى مىندەتىمىزدى ايگىلەپ وتىرمىز. مادەني مۇرامىزدى قورعاۋ – بارشامىزدىڭ ورتاق بورىشىمىز جانە وسىنداي شارالاردى مادەنيەت سالاسىنداعى ماڭىزدى قادام رەتىندە باعالايمىن», دەدى دارحان قىدىرالى.