پرەزيدەنت تاپسىرماسىمەن ەكىباستۇزدا اشىلعان «سامعاۋ» بالالار شىعارماشىلىعى ورتالىعى ەسىگىن ايقارا اشتى. بۇل جاڭا ورتالىق 9 مىڭنان استام جاس تالانتتى, سونىڭ ىشىندە ەرەكشە قاجەتتىلىكتەرى بار بالالاردى دا قابىلداي الادى, دەپ حابارلايدى Egemen.kz.
«سامعاۋ» ورتالىعىندا ءتۇرلى شەبەرلىك ساباقتارى مەن شىعارماشىلىق دارىستەر وتكىزەتىن 50-دەن استام بىلىكتى پەداگوگ جۇمىس ىستەيدى. ورتالىق ەكىباستۇز قالاسى بالالارىنىڭ 70%-نا دەيىن قوسىمشا بىلىممەن قامتىپ, ولاردىڭ قابىلەتتەرىن اشىپ, شىعارماشىلىق الەۋەتىن جۇزەگە اسىرۋعا كومەكتەسەدى.
ء«بىرىنشى قاباتتا بي جانە تەاتر زالدارى, سونداي-اق جەكە مۋزىكا دارىستەرىنە ارنالعان بولمەلەر مەن 275 ورىندىق كورەرمەن زالى ورنالاسقان. بالالار حورەوگرافيامەن, تەاتر ونەرىمەن, ۆوكالمەن جانە اسپاپتا ورىنداۋ شەبەرلىگىمەن اينالىسا الادى. ەكىنشى قاباتتا بيولوگيا زەرتحاناسى, لاندشافتىق ارحيتەكتۋرا مەن فلوريستيكالىق ديزاين ستۋديالارى, دەبات جانە مەديا ورتالىقتار, سونداي-اق fashion-ستۋديا بار. ءۇشىنشى قابات تولىعىمەن IT-تەحنولوگيالارعا ارنالعان: مۇندا روبوتوتەحنيكا مەن كومپيۋتەرلىك مودەلدەۋ كلۋبتارى ورنالاسقان», دەپ حابارلادى ۇكىمەتتىڭ ءباسپاسوز قىزمەتى.
سونىمەن قاتار ورتالىقتا پسيحولوگيالىق-پەداگوگيكالىق قولداۋ كابينەتتەرى, ۇستەل تەننيسى ايماقتارى جانە جاتتىعۋ زالى بار.