ۇلكەن اتام قارىمساقتان تاراعان اكەم كەمەلبەك ايماعانبەت ۇلى 1926 جىلى اقمولا وبلىسىنىڭ شنەت اۋىلىندا دۇنيەگە كەلىپتى. اناسى اقان (شىن اتى راحيما) ايتىپ وتىراتىن, سەگىز قۇرساق كوتەردىم, سودان قالعان جالعىز تۇياق كەمەلبەگىم, دەپ. اكەم اكەسىنەن ەرتە ايىرىلىپتى. انانىڭ بار ءۇمىتى باۋىرىنا باسقان جالعىز ۇلى بولسا كەرەك, ءسويتىپ جۇرگەندە الاپات سوعىس باستالىپ, 1943 جىلى نەبارى 17 جاسىندا سوعىسقا اتتانادى. ال اناسى اقان كەمەلبەكتىڭ ەلگە امان-ەسەن ورالۋىن اللادان تىلەپ قالا بەرگەن.
اكەم التى ايلىق فەلدشەرلىك كۋرستى بىتىرگەن سوڭ الدىمەن گەرمانيانىڭ كەنيگسبەرگ قالاسىنا, كەيىن جاۋ وعىنان جاسىرىنعان ءبىر گوسپيتالدا جارالى سولداتتاردى ەمدەۋگە جىبەرىلەدى. تالاي سولداتتاردى اجالدان امان الىپ قالادى. ەلدەن اراگىدىك حات-حابار الىپ تۇرعان. بىردە ءوزىنىڭ قۇرداسى, ءبىر اۋىلدىڭ جىگىتى قاراتاي دا سول قالالاردىڭ ءبىرىندە ەكەنىن بىلەدى. دەرەۋ حات جازىپ, جاسىرىن, قالانىڭ اتىن قازاقشا كەمەلبۋرگ دەپ حابارلايدى. ول دا بىردەن ءتۇسىنىپ, ەكەۋى كەزدەسىپ, اڭگىمەلەسەدى, بىرگە تۇسكەن سۋرەتتەرى دە بار. ەلىمدى, وتانىمدى ساعىنىپ جۇرگەندە قاراتايدى كورگەندە ەرەكشە كۇيدە بولدىم, دەيتىن اكەم.
نەبىر قيىندىقتار ارتتا قالدى. سوعىس بىتكەنىمەن دە اكەمدى ەلگە جىبەرگەن جوق. سەبەبى, جارالى سولداتتار كوپ ەدى. قاراتاي دا امان-ەسەن ورالدى. ال بەرليندە تىگىلگەن جەڭىس تۋىن ءوز كوزىمەن كورگەن مەنىڭ اكەم ەلگە 1948 جىلدىڭ كۇزىندە ورالىپتى. اكەم سەرجانت دەگەن اسكەري اتاقپەن كەلگەن.
ەرلىك ەسكەرۋسىز قالمايدى ەكەن. اكەمنىڭ سوعىستا دا, سوعىستان كەيىنگى جەڭىس كۇنگى مەرەكەلەردە العان وردەن, مەدالدارى جەتەرلىك. ەلگە كەلگەننەن كەيىن اكەم وتىرىپ قالعان جوق. كولحوز جۇمىستارىنا بەلسەنە ارالاستى. «قىزىل بۇرىشتى» باسقاردى, ورىسشا-قازاقشاعا وتە ساۋاتتى بولدى. اۋىل جۇمىستارىندا جاستاردى ۇيىمداستىرىپ, شارۋاشىلىقتاردى العا سۇيرەدى. سول سۇراپىل جىلداردا العان ءىس-ءتاجىريبەسىن دە جۇزەگە اسىرىپ, ساكۆوياج تولتىرىلعان ءدارىنى ارقالاپ, ناۋقاستاردى دا ەمدەدى. كولحوز جۇمىسىمەن بىرگە دارىگەرلىك كومەك تە كورسەتىپ وتىردى, بۇل مەنىڭ بورىشىم دەيتىن. كۇنى-ءتۇنى ات ۇستىندە ءجۇردى. كولحوزدا بريگادير بولىپ ەڭبەك ەتتى. «باس ەكەۋ بولماي, مال ەكەۋ بولمايدى» دەمەكشى, اكەم 1951 جىلى شاڭىراق كوتەرىپتى. 1952 جىلدىڭ كۇزىندە تۇڭعىشى – مەن دۇنيەگە كەلىپپىن. ءبىر وتباسىندا جەتى بالا اجەم, اكەم جانە انامنىڭ ارقاسىندا وتە تاربيەلى بولىپ وستىك. انام گۇلبارام بۇگىندە استانا قالاسىندا تۇرادى, زەينەتكەر. تاعدىردىڭ ماڭدايعا جازعانى ما, اكەم كەمەلبەك 1967 جىلى تامىز ايىندا جول اپاتىنان قايتىس بولدى.
اكە بايتەرەك بولسا, ءبىز بۇتاعىمىز ءھام جاپىراعىمىز. ۇلكەن اتامىز قارىمساقتىڭ ۇرپاعى بۇگىندە تامىرىن كەڭگە جايىپ كەلەدى. تۋىپ-وسكەن جەرىمىزدە قارىمساق اتامىزدىڭ اتىمەن اتالاتىن كول بار. بۇل دا اتا-بابامىزعا دەگەن ۇلكەن تاعزىم. اتادان بالاعا ميراس. اكەگە بالادان قۇرمەت دەيدى. مەن دە بۇگىن اكەمە دەگەن تولعانىسىمدى قالام ارقىلى جەتكىزىپ وتىرمىن.
گۇل كەمەلبەكقىزى.
استانا.