قانات بوزىمباەۆ سۋ تاسقىنى قاۋپى بار ايماقتاردى ارالادى

جىلىوي اۋدانى قاۋىپتى ايماقتا ورنالاسقان جانە جىل سايىن كوكتەمدە سۋ تاسقىنىنا ۇشىرايدى. سۋ تاسقىنى قاۋپىنىڭ نەگىزگى سەبەبى – ۇزىندىعى 212 شاقىرىمعا سوزىلعان جەم وزەنى. وزەن جاعالاۋى مەن قۇلسارى قالاسى اراسىندا جالپى ۇزىندىعى 65 شاقىرىم قورعانىس بوگەتتەرى سالىنىپ جاتىر. قۇرىلىس جۇمىستارىنا 136 ارنايى تەحنيكا جۇمىلدىرىلعان. قازىرگى تاڭدا سۋ نەگىزىنەن تەرەڭدەتىلگەن جەم وزەنى ارقىلى ءوتىپ جاتىر. قۇلسارى قالاسىندا كۇندەلىكتى باقىلاۋ جۇرگىزىلىپ وتىر. اتىراۋ وبلىسىنىڭ اكىمى سەرىك شاپكەنوۆ اعىمداعى جاعداي تۋرالى بايانداپ, قالادا احۋال تۇراقتى ەكەنىن مالىمدەدى.

قۇلسارىدان بولەك, سۋ باسۋ قاۋپى بار ايماققا ەكى اۋىلدىق وكرۋگ: جەم جانە قاراارنا كىرەدى. قانات بوزىمباەۆ تۇرعىزبا جانە شوقپارتوعاي اۋىلدارىنداعى جاعالاۋدى بەكىتۋ جۇمىستارىمەن تانىسىپ, جەم وزەنىنىڭ جاعالاۋى مەن قۇرساي كانالىن نىعايتۋ جۇمىستارى ءجۇرىپ جاتقان اۋماقتى ارالادى. سونداي-اق جالپى ۇزىندىعى 95 شاقىرىمدى (جەم – 48,9 كم, كۇرساي – 46,1 كم) قامتيتىن ءتۇبىن تەرەڭدەتۋ جۇمىستارى جۇرگىزىلۋدە. قازىرگى ۋاقىتتا جەم وزەنىنىڭ ءتۇبىن تەرەڭدەتۋ تولىق اياقتالدى.

جىلىوي اۋدانىندا بارلىعى 255 ارنايى تەحنيكا جۇمىلدىرىلعان. بوگەتتەردە جاعدايدى تاۋلىك بويى باقىلاۋ ءۇشىن كەزەكشىلىك بەكەتتەرى ۇيىمداستىرىلدى. سونىمەن قاتار اۋدانعا ماڭعىستاۋ وبلىستىق تجد-دان, قورعانىس مينيسترلىگىنىڭ اتىراۋ جانە اقتوبە وبلىستارىنداعى اسكەري بولىمدەرى جانە اتىراۋ وبلىستىق پوليتسيا دەپارتامەنتىنەن قوسىمشا كۇشتەر مەن تەحنيكا جىبەرىلدى.

قانات بوزىمباەۆ اقتوبە وبلىسى بايعانين اۋدانىنىڭ ميالى اۋىلى مەن ويىل اۋدانىنداعى جاعدايمەن دە تانىستى. مۇندا ەرەكشە باقىلاۋدا تۇرعان ويىل وزەنىندە تازالاۋ جانە تەرەڭدەتۋ جۇمىستارى جالعاسىپ جاتىر.

ۆيتسە-پرەمەر اتىراۋ وبلىسى, قىزىلقوعا اۋدانىنىڭ ميالى اۋىلىنا بارىپ, ساعىز اۋىلىنداعى جاعالاۋدى بەكىتۋ جۇمىستارىن باقىلادى. قىزىلقوعا اۋدانى ارقىلى نوعايتى, ويىل جانە ساعىز وزەندەرى وتەدى, ولار كوكتەمگى سۋ تاسقىنى كەزىندە ۇلكەن قاۋىپ توندىرەدى. قورعانىس شارالارى اياسىندا 54 شاقىرىم بوگەت نىعايتىلىپ, 8 شاقىرىم وزەن ارنالارى تازارتىلىپ, تەرەڭدەتىلدى.

وبلىس اكىمدىگىنە ايماقتاعى توتەنشە جاعدايدىڭ الدىن الۋ جانە جويۋ بويىنشا بارلىق جوسپارلانعان شارانى اياقتاۋ, سۋ تاسقىنى قاۋپى تولىق جويىلعانشا, تاۋلىك بويى جۇمىس ىستەۋدى جالعاستىرۋ جانە تۇرعىنداردى كۇن سايىن اعىمداعى جاعدايدان حاباردار ەتىپ وتىرۋ تاپسىرىلدى.