اتىراۋدا ۇلتتىق كيىمدەر شەرۋى ءوتتى. بيىل ەكىنشى رەت وتكەن شەرۋگە قاتىسۋشىلار قازاقتىڭ ۇلتتىق كيىمىن كيىپ شىقتى.
«بۇل شەرۋ اتا-بابامىزدان قالعان اسىل مۇرانى قۇرمەتتەۋدىڭ, ۇلتتىق بولمىسىمىزدى دارىپتەۋ ماقساتىندا ۇيىمداستىرىلدى. اسىرەسە جاستاردىڭ ساناسىنا ۇلتتىق قۇندىلىقتى ساقتاۋدىڭ ماڭىزىن سىڭىرگىمىز كەلدى. ويتكەنى قازاقتىڭ ۇلتتىق كيىمى – تاريحىمىز بەن مادەنيەتىمىزدىڭ ايناسى», دەيدى اتىراۋ قالاسى اكىمىنىڭ ورىنباسارى نۇرجان ەرمۇحانوۆ.
ال وبلىستىق تاريحي-ولكەتانۋ مۋزەيىندە «ۇلتتىق كيىم – ۇلتتىڭ كوركى» ۋاقىتشا كورمەسى اشىلدى. كورمەگە قازاق حالقىنىڭ سانعاسىرلىق تاريحىنان سىر شەرتەتىن 30-دان استام ۇلتتىق كيىم كوللەكتسياسى قويىلدى.
ء«ار ۇلتتىڭ وزىندىك ەرەكشەلىگىن كورسەتەتىن ماڭىزدى بەلگىلەرىنىڭ ءبىرى – ۇلتتىق كيىمى. قازاق حالقىنىڭ ۇلتتىق كيىمدەرى اسەمدىگىمەن, قولونەرلىك ناقىشتارىمەن جانە سيمۆولدىق مانىمەن دارالانادى», دەيدى مۋزەي ديرەكتورى مۇحامبەتقالي كيپيەۆ.
مۋزەي قىزمەتكەرلەرى كورمەگە كەلۋشىلەرگە ۇلتتىق كيىم تۇرلەرىنىڭ دايىندالۋ جولىن, ونداعى قولونەر ەرەكشەلىگى تۋرالى اقپارات بەردى. كوللەكتسيادا مۋزەي قورىندا ساقتالعان شاپان, كۇزەن ىشىك, شەكپەن, كويلەك, كاجەكەي, بەشپەنت سەكىلدى سىرت كيىمدەر بار.
سونداي-اق تۇلكى تىماق, قۇندىز بورىك, تاقيا, كۇلاپارا, ساۋكەلە, كيمەشەك, قاسابا سەكىلدى باسكيىمدەر ۇسىنىلدى. جادىگەرلەر قاتارىن كوكساۋىر كەبىس, شوڭقايما ەتىك, ساپتاما ەتىك, ءماسى تۇرىندەگى سيرەك كەزدەسەتىن اياقكيىمدەر تولىقتىردى.
اتىراۋ وبلىسى