پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين دۇنيەجۇزىلىك بانك وكىلدەرىمەن كەزدەسۋ وتكىزدى.
جيىنعا ورتالىق ازيا بويىنشا وڭىرلىك ديرەكتور تاتيانا پروسكۋرياكوۆا, شىعىس ەۋروپا جانە ورتالىق ازيا ءۇشىن ينفراقۇرىلىم جونىندەگى وڭىرلىك ديرەكتور چارلز كورمە, قازاقستانداعى دۇنيەجۇزىلىك بانكتىڭ تۇراقتى وكىلى اندرەي ميحنەۆ, سونداي-اق قازاقستان, قىرعىزستان جانە تاجىكستان بويىنشا حقك وڭىرلىك مەنەدجەرى زافار حاشيموۆ قاتىستى.
كەزدەسۋدىڭ باستى تاقىرىبى – قازاقستانمەن 2026–2030 جىلدارعا ارنالعان ارىپتەستىكتىڭ جاڭا ستراتەگياسى, ارىپتەستىك تۋرالى نەگىزدەمەلىك كەلىسىمدى (انك) راتيفيكاتسيالاۋ, تالدامالىق قولداۋدى كەڭەيتۋ جانە بىرلەسكەن جوبالاردى ىسكە اسىرۋ. سەرىك جۇمانعارين قازاقستان دۇنيەجۇزىلىك بانكپەن ىنتىماقتاستىقتىڭ ستراتەگيالىق سيپاتىن جوعارى باعالايتىنىن ايتىپ, قۇرىلىمدىق رەفورمالاردى ىسكە اسىرۋدا جانە ينكليۋزيۆتى ەكونوميكالىق ءوسۋدى قامتاماسىز ەتۋدە ارىپتەستىكتىڭ ماڭىزدىلىعىن اتاپ ءوتتى.
«ەلىمىز ءۇشىن ەكونوميكانى ءارتاراپتاندىرۋ, ينۆەستيتسيا تارتۋ, ينفراقۇرىلىمدى دامىتۋ جانە نەگىزگى سالالاردى جاڭعىرتۋ باسىم مىندەتتەر بولىپ قالا بەرەدى. 2025 جىلى ءىجو ءوسىمى 5,6%-دان جوعارى بولۋعا ءتيىس. بانكپەن بىرلەسكەن باستامالار ورنىقتى ەكونوميكالىق دامۋعا قول جەتكىزۋگە كومەكتەسەدى», دەدى ۆيتسە-پرەمەر.
جيىن بارىسىندا دۇنيەجۇزىلىك بانكپەن قازىرگى جانە كەلەشەكتەگى جوبالار تالقىلاندى. ولار: قامباراتا گەس-1 قۇرىلىسى, جەزقازعان – قاراعاندى جوباسى, اۆتوجولداردى جاڭعىرتۋ, ءونىمدى يننوۆاتسيالاردى ىنتالاندىرۋ جانە عىلىم مەن تەحنولوگيانى دامىتۋ, سولتۇستىك ارال تەڭىزى جوباسى, ەنەرگەتيكالىق جانە كوممۋنالدىق سەكتوردى جاڭعىرتۋدى قولداۋ جانە تاعى باسقالار. دۇنيەجۇزىلىك بانكتىڭ ورتالىق ازيا بويىنشا وڭىرلىك ديرەكتورى تاتيانا پروسكۋرياكوۆا ۇيىمنىڭ دامۋ سالاسىنداعى ەڭ ءىرى حالىقارالىق قۇرىلىم بولىپ سانالاتىنىن جانە ونداعان مەملەكەتپەن جۇمىس ىستەيتىنىن ايتتى. ونىڭ سوزىنشە, قازاقستانداعى جوبالار پورتفەلى 2,5 ملرد دوللاردى قۇرايدى.
«ارىپتەستىك تۋرالى نەگىزدەمەلىك كەلىسىمدى راتيفيكاتسيالاۋ ۇدەرىسىن اياقتاۋدى ۇسىنامىز. وسىعان ۇقساس ۋاعدالاستىقتى باسقا دا حالىقارالىق ينستيتۋتتار قولدانۋدا. بۇل بىرلەسكەن جوبالاردى جۇزەگە اسىرۋ ءۇشىن جاڭا مۇمكىندىك تۋعىزادى. ءبىز ديالوگكە اشىقپىز ءارى قازاقستاندى ونىڭ ستراتەگيالىق ماقساتتارىنا قول جەتكىزۋدە قولداۋعا دايىنبىز», دەدى ول.