19 اقپاندا باستالعان « ۇلى جەڭىستىڭ 80 جىلدىعىنا – 80 يگى شارا» اكتسياسى اياسىندا ۇقك شەكارا قىزمەتى الماتى وبلىسى بويىنشا دەپارتامەنتى جەتىسۋ وبلىسىنا قاراستى ۇشتوبە قالاسىنداعى كەمەل توقاەۆ اتىنداعى ورتا مەكتەبىنە ارنايى ات باسىن تىرەدى.
الاپات مايداندى باسىنان وتكەرىپ, تۋعان جەرىنە جەڭىسپەن ورالعان قازاق دەتەكتيۆىنىڭ اتاسى كەمەل توقاەۆتى ۇلىقتاۋعا ارنالعان شارانى اتالعان دەپارتامەنت پەن «گەنەرالدار كەڭەسى» رەسپۋبليكالىق قوعامدىق ۇيىمى بىرلەسىپ ۇيىمداستىردى.
اتالعان مەكتەپتە وتكەن ءىس-شاراعا «گەنەرالدار كەڭەسى» رەسپۋبليكالىق قوعامدىق ۇيىمى پرەزيديۋمىنىڭ توراعاسى گەنەرال-لەيتەنانت ب.سارسەكوۆ, ۇقك شەكارا قىزمەتى الماتى وبلىسى بويىنشا دەپارتامەنتىنىڭ باستىعى پولكوۆنيك ءا.كايۋپوۆ, ەلىمىزدەگى جۋرناليستيكا اكادەمياسىنىڭ اكادەميگى – قازاقستان جازۋشىلار وداعى توراعاسىنىڭ كەڭەسشىسى ن.نۇرعازين, شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگى الماتى قالالىق فيليالىنىڭ توراعاسى زاپاستاعى پولكوۆنيك ا.مۇنالباەۆتار قاتىستى.
سونىمەن قاتار, جيىنعا قاتىسۋشىلاردىڭ قاتارىندا دەپارتامەنتكە قاراستى «سەرجانتتاردى دايارلاۋ مەكتەبىندە» كاسىبي بىلىكتىلىكتەرىن ارتتىرۋ كۋرسىنان ءوتىپ جاتقان اسكەري قىزمەتشىلەرمەن بىرگە «جاس شەكاراشى» اسكەري-پاتريوتتىق كلۋبىنىڭ مۇشەلەرى بولدى.
جازۋشى اتىنداعى ءماجىلىس زالدا وتكەن القالى جيىندا ءسوز سويلەگەن دەپارتامەنت باستىعى الىبەك كايۋپوۆ: «كەمەل توقاەۆ – جازۋشى عانا ەمەس, باتىر, ادىلەتتىلىك پەن ادالدىقتىڭ سيمۆولى. ونىڭ ءومىرى مەن شىعارماشىلىعى – قايسارلىقتىڭ, وتانسۇيگىشتىكتىڭ جانە تۋعان جەرگە دەگەن سۇيىسپەنشىلىكتىڭ ايقىن ۇلگىسى», دەپ اتاپ ءوتتى.
دەتەكتيۆ جانرىنىڭ دارابوزى رەتىندە تانىمال كورنەكتى جازۋشىنىڭ سوعىس تاقىرىبىندا كولەمدى تۋىندىسىنىڭ ءبىرى – «سولدات سوعىسقا كەتتى» رومانى ەكەنى بەلگىلى. ويتكەنى, قانعا بوككەن شايقاس الاڭى جان-جاقتى سۋرەتتەلىپ, اراسىندا سولدات كۇندەلىگىمەن ارلەنىپ وتىراتىن كىتاپتى بويىڭ شىمىرقانباي وقۋ مۇمكىن ەمەس. ال, «جۇلدىزدى جورىق», «قىس قارلىعاشى», «بولاشاق تۋرالى ويلار», «تۇندە اتىلعان وق», «قاستاندىق», «ارناۋلى تاپسىرما», «سارعاباندا بولعان وقيعا», «تاڭبالى اقىن» پوۆەستەرى جانە «سوڭعى سوققى», «سولدات سوعىسقا كەتتى», «ۇياسىنان بەزگەن قۇس» روماندارى قالامگەردىڭ سۋرەتكەرلىك شەبەرلىگىن ايعاقتاي تۇسەدى.
القالى جيىننان كەيىن قوناقتار كەمەل توقاەۆتىڭ «تۇندە اتىلعان وق» شىعارماسى بويىنشا ساحنالانعان قويىلىمدى تاماشالادى.
بۇدان كەيىن مەكتەپ وقۋشىلارى مايتالمان سۋرەتكەردىڭ شىعارمالارىنا نەگىزدەلگەن «جازۋشى الەمىنە ساياحات» اتتى زياتكەرلىك ويىن ۇيىمداستىردى.
ماڭىزدى شارانىڭ تاعى ءبىر ەرەكشەلىگى, جينالعان قاۋىم جازۋشىنىڭ كابينەت-مۇراجايىن كورىپ, ونىڭ شىعارمالارى مەن تۇتىنعان جەكە زاتتارىمەن تانىستى. ال, الىبەك امانگەلدى ۇلى مۇراجايعا دەپارتامەنت اتىنان شەكاراشىلاردىڭ ەل شەبىندەگى قىزمەتى بەينەلەنگەن كارتينانى سىيعا تارتتى.
شارا سوڭىندا «گەنەرالدار كەڭەسى» رەسپۋبليكالىق قوعامدىق ۇيىمىنىڭ توراعاسى گەنەرال-لەيتەنانت ب.سارسەكوۆ پەن دەپارتامەنت باستىعى ءا.كايۋپوۆ باستاعان مارتەبەلى قوناقتار كەمەل توقاەۆ اللەياسىنا اعاش كوشەتتەرىن وتىرعىزدى.
وسىلايشا, ۇلى جەڭىستىڭ 80 جىلدىعىنا بايلانىستى ۇيىمداستىرىلعان شارا مارەسىنە جەتتى. بيىل 102 جاسقا تولاتىن كورنەكتى قالامگەردەن ەڭ باستىسى, ءبىزدىڭ شەكاراشىلار ۇلگى الىپ, ەل تىنىشتىعى ءۇشىن قىزمەت ەتەتىن وتانسۇيگىش ازامات بولۋعا مەيلىنشە تالپىنادى دەپ سەنەمىز.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى.