قالادا 19 ناۋرىز, جاڭارۋ كۇنىنە وراي اۋقىمدى كوگالداندىرۋ جۇمىستارى جۇرگىزىلىپ جاتىر. «جىبەك جولى» ساياباعىندا وتكەن اعاش ەگۋ شاراسىنا قالا اكىمى ازىمبەك پازىلبەك ۇلى, مەملەكەتتىك مەكەمە قىزمەتكەرلەرى, قوعام قايراتكەرلەرى, باق وكىلدەرى مەن قالا تۇرعىندارى بەلسەنە قاتىستى, دەپ حابارلايدى Egemen.kz.
تۇركىستان قالاسى اكىمدىگى مەن وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى ۇيىمداستىرعان اكتسيا اياسىندا 1000-نان استام ادام قاتىسىپ, ساياباق اۋماعىنا اعاش كوشەتتەرىن وتىرعىزعان.
سونىمەن قاتار, «قىلۋەت» مەشىتى, شەكتى تىلەۋ كوشەسى, تولە بي ساياباعى سىندى قالانىڭ وزگە دە ايماقتارىندا اعاش, بۇتا جانە گۇل كوشەتتەرى ەگىلىپ جاتىر.
ايتا كەتەيىك, كوكتەمگى ماۋسىمدا قالا بويىنشا 10 مىڭنان استام اعاش وتىرعىزۋ جوسپارلانعان.
بيىل تۇركىستاندا كوكتەم جانە كۇز مەزگىلدەرىندە بارلىعى 197 010 اعاش پەن 365 144 بۇتا جانە گۇل كوشەتتەرىن وتىرعىزۋ كوزدەلگەن. كوكتەمگى كەزەڭدە وبلىس اكىمدىگى مەن تابيعي رەسۋرستار باسقارماسىنىڭ قولداۋىمەن 111 260 اعاش, 92 661 بۇتا جانە كوپجىلدىق گۇلدەر وتىرعىزىلسا, قالا بيۋدجەتى ەسەبىنەن 85 750 اعاش, 272 483 بۇتا مەن گۇل كوشەتتەرى ەگىلەدى.
ناۋرىز مەيرامىنا وراي وبلىس اۋماعىندا كوگالداندىرۋ جۇمىستارى قارقىندى جۇرگىزىلىپ جاتىر. وتىرعىزىلىپ جاتقان كوشەتتەر قاتارىندا تۇركىستان كليماتىنا بەيىمدەلگەن تەرەك, قاراعاش, ايلانت, قاراعاي, ۇيەڭكى, ارشا, سيريالىق راۋشان, شاعان جانە جەمىس اعاشتارى بار.
بۇل باستاما تۇركىستاننىڭ ەكولوگيالىق جاعدايىن جاقسارتىپ, جاسىل جەلەككە ورانعان كورىكتى قالاعا اينالۋىنا ۇلكەن ۇلەس قوسپاق.