استانادا قورعانىس ءمينيسترى گەنەرال-پولكوۆنيك رۋسلان جاقسىلىقوۆ «قارۋلى كۇشتەردىڭ ارداگەرلەرى» رقب ورتالىق كەڭەسىنىڭ مۇشەلەرىمەن جانە ۇيىمنىڭ وڭىرلىك فيليالدارىنىڭ توراعالارىمەن كەزدەسۋ وتكىزدى.
جيىنعا «قارۋلى كۇشتەردىڭ ارداگەرلەرى» رقب ورتالىق كەڭەسىنىڭ توراعاسى, حالىق قاھارمانى, ارميا گەنەرالى مۇحتار التىنباەۆ, قورعانىس ءمينيسترىنىڭ ورىنباسارلارى, قارۋلى كۇشتەر تۇرلەرىنىڭ باس قولباسشىلارى جانە قورعانىس ىستەرى جونىندەگى دەپارتامەنتتەردىڭ باسشىلارى قاتىستى.
قورعانىس ءمينيسترى جاۋىنگەرلىك دايىندىق, بىتىمگەرلىك قىزمەت, ارميانى تەحنيكالىق جاراقتاندىرۋ, حالىقارالىق ىنتىماقتاستىقتى دامىتۋ جانە مەرزىمدى قىزمەت ساربازدارى ءۇشىن قىزمەت جاعدايلارىن جاقسارتۋ سالاسىنداعى جەتىستىكتەر تۋرالى ايتىپ بەردى. ول سونداي-اق قارۋلى كۇشتەردىڭ جاۋىنگەرلىك داستۇرلەرى مەن رۋحاني قۇندىلىقتارىن ساقتاۋداعى ارداگەرلەر قىزمەتىنىڭ ماڭىزىن اتاپ ءوتتى.
ر.جاقسىلىقوۆ سالانىڭ بۇرىن جويىلعان جەڭىلدىكتەردى قالپىنا كەلتىرۋ جونىندەگى جۇمىسى تۋرالى حاباردار ەتتى. اتاپ ايتقاندا, قورعانىس مينيسترلىگى كوممۋنالدىق وتەماقىعا وزگەرىستەر ەنگىزۋدى, اسكەري قىزمەتشىلەرگە تەگىن جول ءجۇرۋدى جانە دالالىق تولەمدەردى قايتارۋدى ۇسىنىپ وتىر. سونداي-اق 2016 جىلدىڭ 1 قاڭتارىنا دەيىن جۇمىستان شىعارىلعان اسكەري قىزمەتشىلەرگە زەينەتاقىنى يندەكساتسيالايتىن زاڭ جوباسى قاراستىرىلىپ جاتىر. بۇعان قوسا مينيستر اسكەري قىزمەتشىلەر مەن ارداگەرلەرگە مەديتسينالىق كومەك پەن ساناتورلىق-كۋرورتتىق ەمدەۋدى جاقسارتۋ شارالارى قابىلدانىپ جاتقانىن حابارلادى.
2024 جىلى 100-دەن اسا اسكەري زەينەتكەر ستاتسيونارلىق ەم الدى. ال 2 300-دەن اسا ارداگەر كلينيكالىق-دياگنوستيكالىق كومەك الدى. 2025 جىلى ساناتورلىق-كۋرورتتىق ەمدەلۋگە 488 جولداما ءبولۋ جوسپارلانىپ وتىر.