مەملەكەت باسشىسى وقۋ-اعارتۋ ءمينيسترى جۇلدىز سۇلەيمەنوۆانى قابىلدادى

جۇلدىز سۇلەيمەنوۆا جاڭا كونستيتۋتسيا قۇندىلىقتارىن ىلگەرىلەتۋ ماقساتىندا وقۋ باعدارلامالارى مەن وقۋلىقتاردىڭ مازمۇنىن جاڭارتۋ جۇمىستارى جۇرگىزىلىپ جاتقانىن ايتتى. «تازا قازاقستان» باستاماسى اياسىندا ەكولوگيالىق ءبىلىم بەرۋ ستاندارتتارى ازىرلەندى. سونداي-اق مەكتەپتەردە «ادال ازامات» ءبىرتۇتاس تاربيە باعدارلاماسى ەنگىزىلۋدە.

قاسىم-جومارت توقاەۆقا باستاۋىش ءبىلىم بەرۋدىڭ مازمۇنىنا جۇيەلى تالداۋ جاسالعانى باياندالدى. مەكتەپ باعدارلامالارى وقۋ, جازۋ جانە ەسەپتەۋ داعدىلارىنا باسىمدىق بەرە وتىرىپ, قايتا قارالۋدا.

توقاەۆ جوعارى ءبىلىم مەن عىلىمي زەرتتەۋلەردى دامىتۋ بويىنشا بىرقاتار تاپسىرما بەردى

مەملەكەت باسشىسىنا «كەلەشەك مەكتەپتەرى» ۇلتتىق جوباسى اياسىندا 460 مىڭ وقۋشىعا ارنالعان 217 ءبىلىم وشاعىنىڭ قۇرىلىسى اياقتالعانى جونىندە مالىمەت بەرىلدى.

سالانى تسيفرلاندىرۋ بويىنشا كەشەندى شارالار قولعا الىنعان. بۇگىندە مەكتەپتەردىڭ 99 پايىزى ينتەرنەتكە قوسىلدى. «الەۋمەتتىك ءاميان» جوباسى 6760 مەكتەپكە ەنگىزىلگەن. ديپلومدار, اتتەستاتتار مەن انىقتامالار تسيفرلىق فورماتقا كوشىرىلدى. «ۇستاز» پلاتفورماسى پەداگوگتەردى اتتەستاتتاۋ ۇدەرىسىن تولىعىمەن اۆتوماتتاندىرۋعا جول اشادى. 240 مىڭنان استام مۇعالىم جاساندى ينتەللەكتىنى قولدانۋ بويىنشا قايتا دايارلاۋدان ءوتتى, تاعى 200 مىڭ پەداگوگ ChatGPT Edu جوباسىنا ساي جي-اسسيستەنتتى پايدالانۋ ماشىعىن مەڭگەرۋدە.

ايدا بالاەۆا: قازاقستاندا 700-دەن استام ءبىلىم بەرۋ باعدارلاماسى قىسقارتىلادى

مينيستر ينفراقۇرىلىمدى دامىتۋ ماقساتىندا 184 ءبىلىم بەرۋ نىسانى ىسكە قوسىلعانىن جەتكىزدى. ءۇش اۋىسىمدى 80 جانە اپاتتى جاعدايداعى 31 مەكتەپتىڭ ماسەلەسى شەشىمىن تاپتى. 209 ءبىلىم وشاعىنا كۇردەلى جوندەۋ جۇمىستارى جۇرگىزىلىپ, 1192 پاندىك كابينەت زاماناۋي قوندىرعىلارمەن جابدىقتالدى. بالاباقشاعا كەزەك 2 ەسەگە جۋىق قىسقاردى.

پرەزيدەنت ءبىلىم ساپاسىن ارتتىرۋ جانە ونى قولجەتىمدى ەتۋ, مەكتەپتەردەگى ورىن تاپشىلىعىن ازايتۋ, جۇمىسشى مامانداردى دايارلاۋ جۇيەسىن دامىتۋ, بيۋدجەت قارجىسىن ءتيىمدى جۇمساۋ, سالانى تسيفرلىق تۇرعىدان ترانسفورماتسيالاۋ, سونىڭ ىشىندە Qazaq Digital Mektebi جوباسىن ىسكە اسىرۋ بويىنشا بىرقاتار مىندەت جۇكتەدى. سونىمەن قاتار مەملەكەت باسشىسى الداعى ءۇش جىلدا «كەلەشەك مەكتەپتەرى» جوباسىنىڭ وزىق تاجىريبەسىن ءبىلىم بەرۋ ۇيىمدارىنا ەنگىزۋ ماڭىزدى دەپ سانايدى.