مەملەكەت باسشىسىنىڭ بۋرابايدا وتكەن ۇلتتىق قۇرىلتايدا تسيفرلاندىرۋ جانە جاساندى ينتەللەكت ماسەلەلەرى بويىنشا جاساعان مالىمدەمەسى وتە وزەكتى ءارى ۋاقىت تالابىنا ساي. جاساندى ينتەللەكت سالاسى مامانى رەتىندە ايتارىم, پرەزيدەنت قاسىم-جومارت توقاەۆ تسيفرلىق تەحنولوگيالار مەن جاساندى ينتەللەكتىنى ەلىمىزدىڭ ستراتەگيالىق باسىمدىقتارى قاتارىنا جاتقىزا وتىرىپ, دەر كەزىندە ناقتى مىندەتتەردى ايقىنداپ بەردى.
پرەزيدەنتتىڭ مالىمەتتەردى ساقتاۋ جانە وڭدەۋ ءۇشىن قۋاتتى جەلىلەر قۇرۋ تۋرالى ۇسىنىسى وتاندىق جاساندى ينتەللەكتىنىڭ دامۋىندا دەرەكتەر ينفراقۇرىلىمىنىڭ ماڭىزدىلىعىن ناقتى تۇسىنەتىنىن كورسەتەدى.
جاساندى ينتەللەكتى تەحنولوگيالارىن جاپپاي ەنگىزۋ جانە تسيفرلاندىرۋ ۇدەرىستەرىنىڭ ەنەرگەتيكالىق الەۋەتكە تىكەلەي تاۋەلدى ەكەنىن اتاپ وتكەن پرەزيدەنت سوزىمەن تولىق كەلىسەمىن. سەبەبى جاساندى ينتەللەكت ينفراقۇرىلىمىنىڭ تۇراقتى دامۋى ەنەرگەتيكالىق تۇراقتىلىقتى قاجەت ەتەدى. وسى تۇرعىدان العاندا ەلىمىزدىڭ ەلەكتر قۋاتىن وندىرۋدە ءوزىن-ءوزى قامتاماسىز ەتىپ, ەكسپورتقا شىعارۋشى ەلگە اينالۋ جوسپارى وتە ورىندى.
پرەزيدەنتتىڭ جوعارى تەحنولوگيالاردى مەملەكەتتىك باسقارۋدىڭ بارلىق سالاسىنا ەنگىزۋ تۋرالى مىندەتى ەلىمىزدىڭ تەحنولوگيالىق دامۋى مەن باسەكەگە قابىلەتتىلىگىن ارتتىرۋعا زور مۇمكىندىك بەرەدى. الايدا بۇل ءۇشىن ناقتى قۇقىقتىق, تەحنيكالىق جانە ادام كاپيتالىن دامىتۋ بويىنشا مەملەكەتتىك دەڭگەيدە جۇيەلى جۇمىس قاجەت.
سونىمەن قاتار مەملەكەت باسشىسىنىڭ اتاپ وتكەن ءتورت نەگىزگى باعىتى – تسيفرلاندىرۋ جانە جاساندى ينتەللەكت, كولىك تاسىمالى, ەنەرگەتيكا, اگروونەركاسىپ كەشەنى جانە ادام كاپيتالى – ەلىمىزدىڭ يننوۆاتسيالىق دامۋىنىڭ كەشەندى ستراتەگياسى ەكەنىن كورسەتەدى. وسى سالالاردى جاساندى ينتەللەكت تەحنولوگياسىمەن بىرىكتىرۋ ارقىلى قازاقستان ايماقتىق قانا ەمەس, جاھاندىق دەڭگەيدەگى تەحنولوگيالىق كوشباسشىعا اينالا الادى.
جالپى, مەملەكەت باسشىسىنىڭ وسى مالىمدەمەسى ەلىمىزدىڭ الداعى جىلدارداعى تسيفرلىق ترانسفورماتسياسى مەن جاساندى ينتەللەكت سالاسىنىڭ دامۋىنا بەرىك نەگىز قالايدى.
مەيىرجان اۋەلحان ۇلى,
ءىت ساراپشى