ۇلتتىق قۇرىلتايدا تورعاي ەلىنە قاتىستى بىردەڭە ايتىلىپ قالا ما دەپ ەلەڭدەپ وتىرعاندا پرەزيدەنت قاسىم-جومارت توقاەۆتىڭ: «وسى تۇستا تاعى ءبىر ماڭىزدى ينفراقۇرىلىمدىق جوبا قولعا الىناتىنى تۋرالى جاريالاعىم كەلەدى. مەن ۇكىمەتكە استانادان ارقالىق, تورعاي جانە ىرعىز ارقىلى ترانسكاسپي حالىقارالىق كولىك دالىزىنە تۋرا شىعاتىن اۆتوكولىك جولىنىڭ قۇرىلىسىن باستاۋدى تاپسىردىم. جاڭا كۇرە جول ورتالىق جانە باتىس ايماقتار اراسىن 560 شاقىرىمعا قىسقارتادى. بۇل تۇتاس تورعاي ءوڭىرىنىڭ دامۋىنا سەرپىن بەرەتىن اۋقىمدى جوبا» دەگەنىن ەستىپ ريزا بولىپ قالدىق.
تورعايدىڭ ەرتەڭىنە الاڭداپ وتىرعان جانداردىڭ قۋانىشىندا شەك بولعان جوق. الەۋمەتتىك جەلى دە جاعىمدى جاڭالىق ءاپ-ساتتە تاراپ كەتتى. سونىمەن قاتار ودان ءارى ارقالىق قالاسىندا اۋەجايدى قالپىنا كەلتىرۋ مەن جاڭا اەروۆوكزال سالۋ تۋرالى باستامانى دا ەل ەرەكشە قابىلدادى.
سوناۋ 90-جىلداردىڭ سوڭىندا جابىلىپ قالىپ, كەيىن باسقا وبلىستار اشىلعاندا ءارتۇرلى سەبەپپەن تورعاي وبلىسى اشىلماي قالعاندا جەلدىڭ وتىندە, ءۇمىتتىڭ جەتەگىندە جۇرگەن ەل ازاماتتارى عانا ەمەس, جالپى حالىق پرەزيدەنتكە ۇمىتپەن قاراپ, بىرنەشە رەت حات جازىپ ەدى.
ەندى حالىق بيىلعى الاش قايراتكەرى م.دۋلات ۇلىنىڭ 140 جىلدىعى قارساڭىندا ءبىر جاڭالىق بولىپ قالا ما دەپ وتىرعاندا, مەملەكەت باسشىسىنىڭ بۇگىنگى اۋزىنان ايتىلعان جاڭالىقتى ەل قۋانا قابىلداپ قانا قويماي, بۇل كەلەشەكتە تورعاي وبلىسى اشىلۋىنىڭ العاشقى ىرگەتاسىنىڭ قالانۋى ما دەگەن ۇمىتتە وتىر.
جالپى, ەلىمىزدىڭ ىشكى وڭىرلەرىنىڭ دامۋ مۇمكىندىگىن, الەۋەتىن ايقىنداپ ارنايى باعدارلامالار قابىلداسا, تۇبەگەيلى وزگەرىستەر جاسالۋىنا مۇمكىندىك تۋار ەدى. تورعاي ءوڭىرى قازاقستاندا اۋىل شارۋاشىلىعىن دامىتۋدا ساپالى استىعى مەن مال ءوسىرۋ, ەت دايىنداۋ حابى بولۋعا تولىق مۇمكىندىگى بار. جاڭا جۇمىس ورىندارى اشىلسا, وڭىرگە حالىق تۇراقتاپ, كوشى-قون باسەڭدەيدى.
سونىمەن قاتار ەل ىرگەسىنە كەلىپ تۇرعان كوگىلدىر وتىننىڭ تورعايعا تارتىلۋى دا ەلگە ۇلكەن دەمەۋ, جاڭا ەكونوميكالىق سالالار مەن باعىتتاردىڭ قالىپتاسۋىنا مۇمكىندىك بەرەدى.
قۇرمانعالي داركەنوۆ,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى