قازاقستاندا ءبىر جىلدا قانشا جۇپ نەكەگە تۇرىپ, قانشاسى اجىراسقان

نەكەلەسۋدىڭ جالپى كوەففيتسيەنتى 6,13 قۇرادى (1000 ادامعا). نەكەلەسكەندەردىڭ كوپشىلىگى استانا قالاسىندا, 1000 ادامعا شاققاندا 7,34 نەكە كوەففيتسيەنتى, سونداي-اق الماتى (6,98) جانە ۇلىتاۋ وبلىستارىندا (6,70) بايقالدى. نەكەگە تۇرۋدىڭ ەڭ تومەنگى دەڭگەيى باتىس قازاقستان وبلىسىندا – 1000 ادامعا شاققاندا 5,58 نەكە تىركەلگەن.

وتباسىن قۇرعانداردىڭ ءىشىن ەرلەردىڭ 78% جانە ايەلدەردىڭ 79,1% نەكەگە العاش رەت تۇرعان, اجىراسقاننان كەيىن قايتا ۇيلەنگەن ەرلەردىڭ ۇلەسى – 20,8%, تۇرمىسقا شىققان ايەلدەردە –19,4%.

«قالالىق جەرلەردە 82,1 مىڭ نەكە (66,4%), اۋىلدىق جەرلەردە 41,5 مىڭ نەكە (33,6%) تىركەلگەن. العاش نەكە قۇرعان ەرلەردىڭ ورتاشا جاسى 27,9 جاس بولسا, ايەلدەر ءۇشىن – 25,2 جاس. 2024 جىلى نەكە جاز ايلارىندا ەڭ كوپ تىركەلگەن: ماۋسىم – 11 675, شىلدە – 13 739, تامىز – 12 936 بىرلىك», - دەلىنگەن ۇسب حابارلاماسىندا.

بارلىق تىركەلگەن نەكەنىڭ 81,8% مونوەتنيكالىق بولسا, قالعان 18,2% – ەتنوسارالىق.

«اجىراسۋعا كەلەتىن بولساق, 2024 جىلى ولاردىڭ سانى 40,5 مىڭ بولدى. قالالىق جەرلەردە 30,1 مىڭ اجىراسۋ (74,4%), اۋىلدىق جەرلەردە – 10,4 مىڭ اجىراسۋ (25,6%) تىركەلگەن. اجىراسۋدىڭ جالپى كوەففيتسيەنتى 2,01 قۇرادى (1000 ادامعا)», - دەلىنگەن حابارلامادا.

اجىراسۋدىڭ ەڭ جوعارى دەڭگەيى شقو-دا, 1000 ادامعا شاققاندا 3,12 كوەففيتسيەنتىمەن, سونداي-اق قاراعاندى (3,11) جانە پاۆلودار (3,09) وبلىستارىندا بايقالدى. اجىراسۋدىڭ ەڭ تومەنگى دەڭگەيى تۇركىستان وبلىسىندا – 1000 ادامعا شاققاندا 0,90.

نەكە ۇزاقتىعى بويىنشا اجىراسۋلاردىڭ ەڭ كوپ ۇلەسى (35%) 1-4 جىل نەكەدە تۇرعان وتباسىلار اراسىندا, اجىراسۋلاردىڭ 25% – 5 جىلدان 9 جىلعا دەيىن بىرگە تۇرعاندار اراسىندا, تاعى 8% نەكە تىركەلگەننەن كەيىن ءبىر جىل ىشىندە اجىراسقان.