جاقىندا ۇكىمەت بىرىڭعاي ۋاقىت بەلدەۋىنىڭ حالىق ومىرىنە اسەرى جايلى زەرتتەۋدىڭ ناتيجەسىن جاريالاعان ەدى. بۋرابايدا ءوتىپ جاتقان ۇلتتىق قۇرىلتايدا پرەزيدەنت وسى ماسەلەگە قاتىستى ويىن ورتاعا سالدى, دەپ جازادى Egemen.kz.
«ۇكىمەت پەن پارلامەنت بۇل ماسەلەنى تالقىلادى. ارنايى زەرتتەۋلەر جۇرگىزىلدى, شەشىمگە كۇمان كەلتىرگەن قوعام بەلسەندىلەرىنىڭ قاۋپى مەن كۇمان-كۇدىگى راستالعان جوق.ۇكىمەتتىڭ جانە دەپۋتاتتاردىڭ باسىم كوپشىلىگىنىڭ, سونداي-اق مامانداردىڭ ۋاجىمەن كەلىسەمىن: ءبىزدىڭ كەڭ-بايتاق جەرىمىز بار, حالقىمىزدىڭ سانى دا سالىستىرمالى تۇردە العاندا كوپ ەمەس. سوندىقتان ەلىمىزدە بىرىڭعاي ۋاقىت بەلدەۋى بولۋعا ءتيىس. بۇل ءتاسىل مەملەكەتتى باسقارۋ ءىسىن جەڭىلدەتەدى, لوگيستيكا مەن كوپتەگەن بيزنەس-ۇدەرىستى وڭتايلاندىرۋعا سەپتىگىن تيگىزەدى. وسىمەن پىكىرتالاستى دوعارۋ قاجەت دەپ ويلايمىن, ونىڭ ۇستىنە بۇل ماسەلەنى ساياسيلاندىرۋدىڭ قاجەتى جوق», دەدى ق.ك. توقاەۆ.
مەملەكەت باسشىسى ماڭىزدى جيىندا قوعامدىق ادەپ ماسەلەسىنە دە نازار اۋداردى.
«سونداي-اق بۇگىن بەكزات التىنبەكوۆ, ودان بۇرىن باقتىقوجا ىزمۇحامبەتوۆ پەن سۆەتقالي نۇرجان قوعامدىق ادەپ ماسەلەسىن قوزعادى. بۇل وتە ورىندى دەپ ويلايمىن. قازىر الەۋمەتتىك جەلىدە ادامعا ءتىل تيگىزۋ, ار-نامىسىن اياققا تاپتاۋ كوبەيىپ كەتتى. جالعان مالىمەت تاراتۋشىلار بار. مۇنداي كەلەڭسىز ۇردىستەردى تىيۋ جولىن قاراستىرۋ كەرەك», دەدى پرەزيدەنت.