مەملەكەت شاعىن جانە ورتا بيزنەستى قولداۋ ماقساتىندا ءتۇرلى باعدارلامالار مەن باستامالاردى ۇسىنىپ وتىر. ارينە, سالادا تاۋەكەلدەر مەن تۇيتكىلدەر جوق ەمەس. دەگەنمەن جاقسى مۇمكىندىك تە بار. وسى رەتتە وقىرمان مەن كاسىپكەرلەر نازارىنا قازىرگى ۋاقىتتاعى قولجەتىمدى باستامالاردى ايتا كەتكەن ءجون.
«بيزنەستىڭ جول كارتاسى – 2025». بۇل – بيزنەستىڭ دامۋىنا جول اشاتىن باستى باعدارلامالاردىڭ ءبىرى. باعدارلاما اياسىندا نەسيەگە سۋبسيديا بەرىلەدى. ءتىپتى كەپىل جەتپەگەن جاعدايدا مەملەكەتتىك كەپىلدىكتى الىپ, اقشاعا قول جەتكىزۋگە مۇمكىندىك بار. گرانتتار بولىنەدى. جاڭا بيزنەس-يدەيالارعا اقشا بەرىلەدى. وقىتۋ مەن كونسۋلتاتسيا قاراستىرىلعان. ءوزىنىڭ كاسىبي داعدىسىن جەتىلدىرۋدى كوزدەپ, بيزنەس جۇرگىزۋ قابىلەتىن دامىتقىسى كەلگەن جاندار بۇل باعدارلامانى پايدالانا الادى.
«دامۋ» قورى. بۇل قور اسىرەسە, وڭىرلەردە وركەن جايعىسى كەلگەن بيزنەسكە كوبىرەك كومەكتەسەدى. نەسيە جىلدىق 8 پايىز مولشەرلەمەمەن ۇسىنىلادى. باسىم سالالارداعى بيزنەس ءۇشىن وتە ءتيىمدى. قوردىڭ شەتەلدىكتەرمەن جۇمىس ىستەۋ باعدارلاماسى دا بار. ياعني شەتەلدىك ينۆەستيتسيا مەن جاڭا تەحنولوگيا تارتۋعا سەپتىگى تيەتىنى ءسوزسىز.
سالىقتىق جەڭىلدىكتەر. بيزنەسكە بىرقاتار سالىق جەڭىلدىگى جاسالدى. سونىڭ ءبىرى – قوسىلعان قۇن سالىعىن (ققس) قايتارىپ بەرۋ. ەگەر وندىرىسپەن نەمەسە تاۋار ەكسپورتتاۋمەن اينالىسساڭىز, ققس بويىنشا كەتكەن شىعىندى قايتارىپ الۋعا بولادى. بولشەك سالىق. كىشىگىرىم كاسىپكەرلەرگە سالىق سالۋدىڭ جەڭىلدەتىلگەن جۇيەسى ەنگىزىلگەن.
وقىتۋ جانە تاجىريبەدەن وتكىزۋ. داعدىنى جەتىلدىرۋ باعىتىندا مىناداي مۇمكىندىكتەر بار:
شەتەلدە ءىس-تاجىريبەدەن ءوتۋ. شەتەلگە بارىپ كومپانيالاردىڭ قالاي جۇمىس ىستەيتىنىن كوزبەن كورىپ, بايلانىس ورناتۋ; تەگىن وقىتۋ. ساتىلىم, قارجى, باسقارۋ بويىنشا ءتاپ-ءتاۋىر ءبىلىم الۋعا جول اشاتىن كاسىپكەرلەرگە ارنالعان كۋرستار بار.البەتتە, بۇل باعدارلامالاردىڭ بارلىعى بىردەي كەرەمەت ەمەس تە شىعار. الايدا بۇل مۇمكىندىكتى قاجەتىنە قاراي پايدالانۋ ءومىردى اجەپتاۋىر جەڭىلدەتىپ, بيزنەستى دامىتۋعا مۇرىندىق بولادى. ەڭ باستىسى – بىلۋگە ۇمتىلۋدان قورىقپاۋ, تاۋەكەلگە بارىپ ءوتىنىم بەرۋ, ءسويتىپ كەرەگىڭدى الۋ. بۇل باستامالاردىڭ ءبارى بىزگە, ياعني كاسىپكەرلەرگە پايدالانۋ ءۇشىن جاسالىپ وتىر.
وسى ورايدا ەستە ۇستايتىن قاعيدالار دا بار. كاسىبىن ەندى باستاعاندار بۇل حاقىندا دا بىلگەنى ءجون دەپ ەسەپتەيمىن, – مەملەكەت شاعىن جانە ورتا بيزنەسكە كەلەسىدەي جاعدايلاردى جاساپ بەرە المايدى:
تۇراقتى نارىق. مەملەكەت سۇرانىس پەن باسەكەنى قاداعالاي المايدى. ويتكەنى اتالعان ەكى فاكتور تۇتىنۋشى مەن جاھاندىق جاعدايعا تىكەلەي تاۋەلدى. كەپىلدەندىرىلگەن تابىس. تاۋەكەل ءار كەز كاسىپكەردىڭ اينالاسىندا قالا بەرەدى. ەشكىم دە كاسىپكەرگە كول-كوسىر تابىسقا ۋادە بەرمەيدى. تابىستىڭ كىلتى دە, كىلتيپانى دا كاسىپكەردىڭ وزىندە. ءمىنسىز ماماندار. مەملەكەت وقىتۋ, ءبىلىم جەتىلدىرۋ تۇرعىسىنان بيزنەسكە كومەكتەسەدى, بىراق قىزمەتكەرلەردى ىنتالاندىرۋ جانە ولاردىڭ كاسىبي بىلىكتىلىگىن جوعارىلاتۋ بيزنەستىڭ وزىنە تىكەلەي بايلانىستى. كرەاتيۆتى يدەيالار. عاجايىپ ۇسىنىستى قالاي ويلاپ تابۋدى, ونى قالاي ۇسىنۋدى كاسىپكەردىڭ ءوزى عانا بىلەدى. بيۋروكراتيادان تولىقتاي تاۋەلسىزدىك. بيزنەستى تەكسەرۋدى جەڭىلدەتكەننىڭ وزىندە باقىلاۋ, ەسەپ جانە ەرەجەلەردى ەشكىمنىڭ دە جويۋى مۇمكىن ەمەس.بيزنەس قاشاندا تاۋەكەلدەر مەن بەلگىسىزدىككە تولى. قيىندىققا ۇرىنعان جاعدايدا تىعىرىقتان شىعار جولدى تەك كاسىپكەردىڭ ءوزى تابادى. باستاعان كاسىبىن قۇردىمعا كەتىرۋ دە, تابىسقا جەتكىزۋ دە كاسىپكەردىڭ ءوز قولىندا.