«AMANAT» پارتياسىندا قازاقستاننىڭ 20 وڭىرىندەگى اكىمدىكتەردىڭ 2023-2027 جىلدارعا ارنالعان «حالىقپەن بىرگە!» سايلاۋالدى باعدارلاماسىن ورىنداۋ بارىسى تالقىلاندى. ەسەپ بەرۋ كەزدەسۋلەرىندە وڭىرلەردەگى جەتىستىكتەر مەن شەشىلمەگەن ماسەلەلەر, سونداي-اق اكىمدەر مەن ءماسليحات دەپۋتاتتارىنىڭ جەكە جاۋاپكەرشىلىگى كوتەرىلدى, دەپ حابارلايدى Egemen.kz.
وتكەن كەزدەسۋلەر بارىسىندا وڭىرلەردەگى اكىمدەردىڭ ورىنباسارلارى جۇمىس ورىندارىن قۇرۋ, الەۋمەتتىك ينفراقۇرىلىمدى دامىتۋ جانە بىرقاتار ينۆەستيتسيالىق جوبالاردى جۇزەگە اسىرۋ باعىتىنداعى جەتىستىكتەرگە توقتالدى. «AMANAT» پارتياسىنىڭ حاتشىسى ەرجان جىلقىباەۆ اتاپ وتكەندەي, قارجىلاندىرۋ كولەمىنىڭ جەتكىلىكسىزدىگى, جوسىقسىز مەردىگەرلەر, سونداي-اق ۇزاققا سوزىلعان سوت پروتسەستەرى كوپتەگەن وڭىرلەر ءۇشىن ورتاق ماسەلە بولىپ وتىر.
«سايلاۋالدى باعدارلامانى جۇزەگە اسىرۋ قارقىنىن تومەندەتىپ الماۋ قاجەت. ازاماتتارعا ۋادە ەتىلگەن ءاربىر جوبانى تولىق اياقتاۋ ءۇشىن بارلىق كەدەرگىنى جويىپ, رەسۋرستاردى جۇمىلدىرۋ كەرەك. بۇل ماسەلە ءجىتى نازارعا الىنادى. جەرگىلىكتى جەرلەردە سايلاۋالدى باعدارلامانى جۇزەگە اسىرۋ جۇمىسىنا اكىمدىكتەر مەن ءماسليحات دەپۋتاتتارى دەربەس جاۋاپكەرشىلىك ارقالايدى», دەدى ول.
وڭىرلىك سايلاۋالدى باعدارلامالاردى جۇزەگە اسىرۋداعى اۋقىمدى جەتىستىكتەردى دە اتاپ ءوتۋ قاجەت. ماسەلەن, بىلتىر استانا قالاسىندا 42 مىڭنان استام جۇمىس ورنى قۇرىلىپ, 16 مەكتەپ ىسكە قوسىلعان.
سونىمەن قاتار ەسىل وزەنى ارقىلى اۆتوجول كوپىرى سالىنىپ, 130-دان استام سپورت الاڭى جابدىقتالعان. قوستاناي وبلىسىندا اۋىل شارۋاشىلىعى سالاسىندا 45 جوبا, 28 ءىرى ونەركاسىپتىك جوبا ىسكە اسىرىلدى, 1100 شاقىرىمنان استام اۆتوجول جوندەلدى. پاۆلودار وبلىسىندا شارۋالارعا قولداۋ كورسەتۋ ماقساتىندا 1627 تەحنيكا ساتىپ الىندى, 20 ءبىلىم بەرۋ نىسانىنا كۇردەلى جوندەۋ جۇرگىزىلدى. قاراعاندى وبلىسىندا 540,3 مىڭ شارشى مەتر تۇرعىن ءۇي پايدالانۋعا بەرىلدى (شامامەن 3900 پاتەر), 183,7 شاقىرىم سۋ قۇبىرى جەلىلەرى تارتىلدى جانە قايتا جاڭارتىلدى. شىعىس قازاقستان وبلىسىندا جول قۇرىلىسى سالاسىندا جەتىستىكتەر بايقالادى, پايدالانىلماي جاتقان 109,6 مىڭ گەكتار جەر مەملەكەت مەنشىگىنە قايتارىلدى, 1,6 مىڭ كاسىپكەرلىك سۋبەكتىسى قارجىلىق قولداۋ شارالارىمەن قامتىلدى. ال تۇركىستان وبلىسىندا 19 ينۆەستيتسيالىق جوبا ىسكە اسىرىلدى, 17 اۋىلدا سۋدى تازارتۋ بلوك-مودۋلدەرى ورناتىلدى, 54 ەلدى مەكەنگە گاز تارتىلدى, «تۇركىستان – سامارقاند» اۆيارەيسى ۇيىمداستىرىلدى.
«جۋىق ارادا شەشۋدى تالاپ ەتەتىن پروبلەمالىق ماسەلەلەر دە بار. استانادا نوسەر كارىزىن سالۋ جۇمىسىن اياقتاۋ جانە جەكەلەگەن الەۋمەتتىك قۇرىلىستارداعى پروبلەمالار ماسەلەسى وتكىر تۇر. قوستاناي وبلىسىندا كوپتەگەن نىسان سۋ تاسقىنى سالدارىنان كەيىن شۇعىل قايتا جاڭعىرتۋدى قاجەت ەتەدى. سونداي-اق مەردىگەر ۇيىمداردىڭ جۇمىسىنا قاتىستى ماسەلەلەر ءالى تولىق شەشىمىن تاپقان جوق. پاۆلودار وبلىسىندا مەديتسينالىق مەكەمەلەردى جوندەۋ جۇمىسىنا قاتىستى ايتارلىقتاي جەتىستىكتەرگە قاراماستان, قارجىلاندىرۋ كولەمىنىڭ جەتكىلىكسىزدىگىنە بايلانىستى بىرقاتار اۋىلدى سۋمەن جابدىقتاۋ ماسەلەسى قيىندىق تۋدىرىپ وتىر. قاراعاندى وبلىسىندا وندىرىستىك جاراقاتتار سانى ارتىپ كەلەدى. ونى ازايتۋ ءۇشىن كاسىپورىنداردا باقىلاۋ جۇرگىزۋ جۇمىسىن كۇشەيتۋ قاجەت. شىعىس قازاقستان وبلىسىندا اۋىل شارۋاشىلىعى سالاسىنداعى بىرنەشە ماڭىزدى جوبانى اياقتاۋ مەرزىمى شەگەرىلىپ جاتىر», دەپ حابارلادى پارتيانىڭ ءباسپاسوز قىزمەتى.
جيىن بارىسىندا قاتىسۋشىلار كەيبىر جوبانى قارجىلاندىرۋ كولەمىنىڭ جەتكىلىكسىزدىگى, جوسىقسىز مەردىگەرلەر ماسەلەسى, جوبالاۋ-سمەتالىق قۇجاتتامانىڭ سوزىلۋى, سوت تالقىلاۋلارى جانە بيۋروكراتيالىق كەدەرگىلەر سىندى ماسەلەلەردى اتاپ ءوتتى. كەيبىر اۋداندا تۇرعىنداردى ساپالى اۋىز سۋمەن جانە گازبەن قامتاماسىز ەتۋ ماسەلەسى ءالى دە شەشىلمەي تۇر. مەكتەپتەر مەن مەديتسينالىق نىسانداردىڭ قۇرىلىسى بەلگىلەنگەن مەرزىمدە اياقتالماعان.
پارتيالىق باقىلاۋ كوميتەتىنىڭ توراعاسى, ءماجىلىس دەپۋتاتى پاۆەل كازانتسەۆ ماسليحاتتارداعى «AMANAT» پارتياسىنىڭ دەپۋتاتتارىنا وڭىرلىك سايلاۋالدى باعدارلامالاردىڭ ناقتى تارماقتارى بەكىتىلگەنىن ەسكە سالدى. ونىڭ ايتۋىنشا, «AMANAT» پارتياسىنىڭ مۇشەلەرى ەكەنىن «ۇمىتىپ كەتكەن» ءماسليحات دەپۋتاتتارى مانداتتارىنان ايىرىلۋى مۇمكىن.
«بىزدە سايلاۋالدى باعدارلامانى ورىنداۋعا قاجەت بارلىق قۇرال بار. ماسليحاتتاعى دەپۋتاتتارىمىز قارجىلاندىرۋ ماسەلەسىنە اسەر ەتە الادى: سايلاۋشىلار اۋىلعا بالاباقشا سالۋ قاجەت دەسە, دەمەك, ونى سالۋ كەرەك. نىسان قۇرىلىسىنىڭ اياقتالۋ مەرزىمىن شەگەرۋگە بولمايدى. ادامدار ناقتى ۋادەلەرىمىزگە سەنىپ, بىزگە داۋىس بەردى. ءبىز سايلاۋشىلارعا بەرگەن ۋادەمىزدى سۋ تاسقىنىنا دا, ينفلياتسياعا دا قاراماستان ورىنداۋىمىز كەرەك. ول ءبىزدىڭ مىندەتتىمىز. ەگەر پارتيامىزدىڭ مۇشەسى ەكەنىن «ەستەن شىعارىپ العان» دەپۋتاتتار بولسا, ونداي ازاماتتارمەن قاتار جۇرە المايمىز», دەدى ول.
جيىن قورىتىندىسى بويىنشا وڭىرلەردەگى اكىمدىكتەر ءۇشىن ناقتى ۇسىنىستار قابىلداندى: مەردىگەر ۇيىمداردىڭ جۇمىسىنا باقىلاۋ جۇرگىزۋ جۇمىسىن كۇشەيتۋ, بەلسەندى تۇردە ينۆەستيتسيا تارتۋ جانە پروبلەمالىق نىساندار قۇرىلىسىن ۋاقتىلى اياقتاۋ ءۇشىن قاجەت بولعان جاعدايدا بيۋدجەتكە وزگەرىستەر ەنگىزۋ. سايلاۋالدى باعدارلامانىڭ ناقتى تارماقتارىنا جاۋاپتى ءماسليحات دەپۋتاتتارى ۋادەلەر ورىندالماعان جاعدايدا تولىق جاۋاپ بەرۋگە ءتيىس ەكەنىنە ەرەكشە نازار اۋدارىلدى.
جۋىردا «AMANAT» پارتياسىنىڭ وڭىرلىك فيليالدارىندا ماسليحاتتارداعى فراكتسيالاردىڭ قوسىمشا وتىرىستارى وتەدى. وندا سايلاۋالدى باعدارلامانىڭ ءاربىر پروبلەمالىق تارماعى بويىنشا ەسەپتەر تىڭدالىپ, جەدەل شارا قابىلداۋ ماسەلەسىنە نازارعا الىنادى.