الماتىدا رەسپۋبليكالىق «تازا قازاقستان» باعدارلاماسى مەن قالالىق «الماتى – ورتاق ءۇيىمىز» باستاماسى اياسىندا جىلجىمالى ەكوحاب ۇيىمداستىرىلدى.
ەكوحاب بارىسىندا قالا تۇرعىندارى پلاستيكتى قايتا وڭدەۋمەن تانىسىپ, ەكولوگيالىق جاۋاپكەرشىلىك تۋرالى ماعلۇمات الدى. پلاستيك بۇيىمداردى فاندوماتقا وتكىزىپ, اقشالاي سىياقى الۋ مۇمكىندىگىن دە سىناپ كوردى.
پانفيلوۆ كوشەسىندە بىلتىر قالا اكىمدىگىنىڭ جوبالىق كەڭسەسىنىڭ قولداۋىمەن العاشقى فاندومات ورناتىلعان بولاتىن. سودان بەرى بۇل ورىن ەكولوگيالىق باستامالاردىڭ ورتالىعىنا اينالعان.
Eco Network جوباسىنىڭ نەگىزىن قالاۋشى ەۆگەني مۇحامەدجانوۆ مۇنداي باستامالار قالا تۇرعىندارىنا ەكولوگيالىق ادەتتەردى ۇيرەنۋگە ىقپال ەتەدى. ايتۋىنشا, فاندوماتتار – بۇل پلاستيك قالدىقتارىنان قۇتىلۋدىڭ ىڭعايلى ءادىسى عانا ەمەس, سونىمەن قاتار قورشاعان ورتاعا سانالى كوزقاراستى قالىپتاستىرۋدىڭ قۇرالى. ادامداردىڭ قاراپايىم ارەكەتى دە ەكولوگيانى جاقسارتۋعا ۇلەس قوسا الاتىنىن تۇسىنگەنىن قالايمىز. قالدىقتاردى قايتا وڭدەۋ ءبىر رەتتىك ەمەس, كۇندەلىكتى ءومىردىڭ ءبىر بولىگىنە اينالۋى ءتيىس. وسى رەتتە قالا تۇرعىندارى ەكولوگيالىق بولاشاققا قاراي قادام جاساپ كەلەدى.
ەكوحاب بەلسەندىسى, 5-سىنىپ وقۋشىسى ءىلياس احمەتوۆتىڭ ايتۋىنشا, ء ار اۋلادا وسىنداي اپپاراتتار ورناتىلسا, ەشكىم پلاستيك بوتەلكەلەردى جاي عانا قوقىسقا تاستاماس ەدى. «ەكولوگيا تۋرالى بۇرىن ويلانباعان دوستارىمنىڭ ءوزى قىزىعا باستادى. ءبىز مەكتەپتەن كەيىن پلاستيك جيناپ, ونى وتكىزىپ تۇرۋعا كەلىستىك» دەيدى ول.
ەكوحاب الماتىلىقتار اراسىندا ەكولوگيالىق ادەتتى ناسيحاتتاۋعا باعىتتالعان ماڭىزدى قادام بولىپ وتىر. ۇيىمداستىرۋشىلار مۇنداي شارالاردى قوعامدىق ورىنداردا عانا ەمەس, ساۋدا ورتالىقتارىندا, ساياباقتاردا جانە قالالىق الاڭداردا وتكىزىپ, مۇمكىندىگىنشە قورشاعان ورتانى قورعاۋ ىسىنە قالا تۇرعىندارى مەن قوناقتاردى كوپتەپ تارتۋدى جوسپارلاپ وتىر.
الماتى