قازاقستان مۇسىلماندارى ءدىني باسقارماسى قاسيەتتى رامازان ايىندا بىرقاتار مەيرامحانا, ءدامحانالاردىڭ اۋىزاشار ءمازىرىنىڭ باعاسىن شارىقتاتىپ جىبەرگەنىن سىناپ, تاماقتانۋ ورىندارىن حالىققا قولجەتىمدى باعا ۇسىنۋعا شاقىردى, دەپ حابارلايدى Egemen.kz.
ءمۇفتياتتىڭ مالىمدەمەسىندە رامازان ايىنىڭ قاراپايىمدىلىق پەن مەيىرىمدىلىككە نەگىزدەلگەنى, ال اۋىزاشار داستارحانىنىڭ ىسىراپقا ەمەس, ساۋاپقا باعىتتالۋى ءتيىس ەكەنى باسا ايتىلدى. قاسيەتتى قۇراندا دا ىسىراپتىڭ قۇپتالمايتىنى ەسكەرتىلىپ, حالىقتى شىنايى قايىرىمدىلىققا ۇندەگەن.
«وكىنىشكە قاراي, سوڭعى كەزدەرى ەلىمىزدەگى بىرقاتار مەيرامحانا, كافەلەر مەن ءدامحانالاردىڭ يەلەرى اۋىزاشار ءمازىرىنىڭ باعاسىن وتە جوعارى ۇسىنىپ, حالىق اراسىندا تۇسىنبەۋشىلىكتىڭ تۋىنداۋىنا سەبەپشى بولۋدا. اسىل ءدىنىمىز اۋىزاشار داستارقانىندا اس تا توك ىسىراپقا جول بەرۋگە, داستارقان جاساۋدا باسەكەلەسۋدى قۇپتامايدى. ونداي ارەكەت ساۋاپقا ەمەس كۇناعا جەتەلەيدى», دەلىنگەن ءمۇفتيات سايتىندا.
ءمۇفتيات بۇل ۇندەۋى ارقىلى قاسيەتتى ايدا جاسالعان يگى امالداردىڭ شىنايى ساۋاپقا اينالاتىنىنا سەنىم ءبىلدىردى.
«قازاقستان مۇسىلماندارى ءدىني باسقارماسى مەيرامحانا, كافەلەر مەن تاماقتانۋ ورىندارىنىڭ يەلەرىنە حالىققا قولجەتىمدى قاراپايىم اۋىزاشار ءمازىرىن ۇسىنۋعا شاقىرادى», دەلىنگەن حابارلامادا.