8 ناۋرىزدا سەربيانىڭ نيش قالاسىندا بوكستان ايەلدەر اراسىنداعى الەم چەمپيوناتى باستالادى. سول جارىستا جەرلەستەرىمىزدىڭ قانداي قۇرامدا ونەر كورسەتەتىنى بەلگىلى بولدى.
قازاقستان قۇراماسىنىڭ باس باپكەرى ەلدوس ءسايداليننىڭ تاڭداۋى مىنا بىلعارى قولعاپ شەبەرلەرىنە ءتۇستى: 48 كگ – نازىم قىزايباي, 50 كگ – الۋا بالقىبەكوۆا, 52 كگ – انيتا ادىشەۆا, 54 كگ – جاينا شەكەربەكوۆا, 57 كگ – كارينا يبراگيموۆا, 60 كگ – ۆيكتوريا گرافەەۆا, 63 كگ – ايدا ابىكەەۆا, 66 كگ – جاسمين قيزاتوۆا, 70 كگ – ناتاليا بوگدانوۆا, 75 كگ – نادەجدا ريابەتس, 81 كگ – گۇلسايا ەرجان جانە +81 كگ – ەلدانا ءتالىپوۆا.
ەسىمدەرى اتالعان بۇرىمدىلداردىڭ دەنى تالاي دۇرمەكتە ىسىلعان ساقا سپورتشىلار. ماسەلەن, نازىم قىزايبايدىڭ ەكى دۇركىن الەم چەمپيونى جانە پاريج وليمپياداسىنىڭ قولا جۇلدەگەرى دەگەن اتاعى بار. وسىدان ءتورت جىل بۇرىن ول دۋبايداعى ازيا بىرىنشىلىگىندە دارالاندى. جاسى 31-دەن اسسا دا نازىم ءالى دە بابىندا.
ءار جىلدارى جاينا شەكەربەكوۆا, كارينا يبراگيموۆا جانە نادەجدا ريابەتس وليمپيا ويىندارىندا قاتىستى. تورتجىلدىقتىڭ باستى دوداسىندا ولاردىڭ باعى جانباعانىمەن, الەم جانە قۇرلىق چەمپيوناتتارىندا سان مارتە جەڭىس تۇعىرىنا كوتەرىلدى. الۋا بالقىبەكوۆا دۇنيەجۇزىلىك دودادا بىرنەشە رەت جۇلدەگەرلەر قاتارىنان كورىنىپ, ەكى رەت ازيادا التىننان القا تاقتى. سول سەكىلدى باسقا دا جەرلەستەرىمىزدىڭ باعىندىرعان بەلەستەرى ءبىر توبە.