اسلامبەك مەرعاليەۆ احقو سوتىنىڭ توراعاسى لورد بەرنەتتپەن كەزدەستى. ءىس-شاراعا سونداي-اق احقو سوتىنىڭ جانە حاو رەگيستراتورى كريستوفەر كەمپبەلل-حولت قاتىستى, دەپ حابارلايدى Egemen.kz جوعارعى سوتتىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا ا.مەرعاليەۆ قازاقستاننىڭ سوت جۇيەسى مەن احقو سوتى اراسىنداعى ىنتىماقتاستىق تۋرالى مەموراندۋم شەڭبەرىندە داۋلاردى احقو سوتى مەن حاو قاراۋىنا بەرۋ ۇدەرىسى جاندانعانىن اتاپ ءوتتى. شەتەلدە اتالعان سوتتاردىڭ شەشىمدەرىن تانۋ جانە ورىنداۋ تەتىكتەرى تالقىلانىپ, احقو سوتىن ىلگەرىلەتۋگە جانە ونىڭ تمد ەلدەرىندەگى مارتەبەسى تۋرالى اقپاراتتاندىرۋعا كومەك كورسەتىلدى.
جس توراعاسى جوعارعى سوتتىڭ احقو ينۆەستورلار مەن بيزنەستى تارتۋ ورتالىعىنا اينالۋىنا مۇددەلى ەكەنىن, بۇل, ءوز كەزەگىندە, قازاقستاننىڭ سەنىمى مەن ينۆەستيتسيالىق تارتىمدىلىعىن ارتتىراتىنىن اتاپ ءوتتى.
ل.بەرنەتت, ءوز كەزەگىندە, جوعارعى سوتپەن ىنتىماقتاستىق تۋرالى مەموراندۋمدى جۇزەگە اسىرۋ شەڭبەرىندە احقو سوتى مەن حاو تورەلىك ورتالىعىنىڭ قىزمەتى تۋرالى حاباردار ەتتى.
تاراپتار بىرقاتار بىرلەسكەن ءىس-شارالاردى وتكىزۋدى تالقىلادى جانە مۇنداي ءوزارا ءىس-قيمىل احقو سوت ورگاندارىنىڭ قىزمەتىن كەڭەيتۋگە ىقپال ەتەتىنىنە سەنىم ءبىلدىردى.
ايتا كەتسەك, ىنتىماقتاستىق تۋرالى مەموراندۋمعا 2021 جىلى قر جوعارعى سوتىنىڭ, احقو سوتىنىڭ جانە حالىقارالىق اربيتراج ورتالىعىنىڭ (حاو) باسشىلارى قول قويعان. ول سوت تورەلىگىنىڭ بىرىڭعاي ستاندارتتارىن ىلگەرىلەتۋ بويىنشا بىرلەسكەن باستامالاردى جۇزەگە اسىرۋعا باعىتتالعان.
مەموراندۋمعا قاتىسۋشىلار حالىقارالىق باعدارلامالار, كوپجاقتى قارىم-قاتىناستار مەن بايلانىستار, سونداي-اق ءبىلىم بەرۋ جانە عىلىمي-زەرتتەۋ ءىس-شارالارى, قۇقىقتىق اقپاراتپەن سوت پراكتيكاسىمەن ءوزارا الماسۋ شەڭبەرىندە كوممەرتسيالىق داۋلاردى شەشۋ سالاسىندا زەرتتەۋ جانە تاجىريبە الماسۋ, كونسۋلتاتسيالار جۇرگىزۋ, ءوزارا قولداۋ كورسەتۋ جانە ورتاق ۇستانىمداردى دامىتۋدى جوسپارلاعان.