قوستانايدا قىسقى سپورت تۇرلەرىنەن وبلىستىق سپارتاكيادا جالاۋىن كوتەردى. ءداستۇرلى سپورت دوداسىندا وبلىسقا قاراستى 4 قالانىڭ, 16 اۋداننىڭ قۇراما كوماندالارى باق سىنايدى, دەپ جازادى Egemen.kz.
سپورت مەرەكەسىنىڭ سالتاناتتى اشىلۋ راسىمىندە وبلىستىق دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى دۋلات سوۆەتحان ۇلى جارىسقا قاتىسۋشىلارعا ساتتىلىك تىلەي كەلىپ, وڭىردە قىسقى سپورتتىڭ دامۋىنا جان-جاقتى جاعداي جاسالىپ جاتقانىن ايتتى. سونداي-اق, تاياۋدا عانا حاربيندە وتكەن IX قىسقى ازيا ويىندارىنان جۇلدەمەن ورالعان شورت-ترەكشى گلەب يۆچەنكو مەن شاڭعىشىلار نايل باشماكوۆ, ۆلاديسلاۆ كوۆالەۆكە العىس ءبىلدىردى.
باسقارما باسشىسىنىڭ ايتۋىنشا, قىسقى سپورت تۇرلەرىن كەشەندى دامىتۋ ماقساتىندا وبلىستا 3 سپورت سارايى, 77 حوككەي كورتى, 36 شاڭعى بازاسى جۇمىس ىستەپ جاتىر. الداعى ۋاقىتتا «اۋىل-ەل بەسىگى» باعدارلاماسى اياسىندا اۋدان ورتالىقتارىندا 6 جابىق حوككەي كورتىنىڭ قۇرىلىسى جوسپارلانعان.
جارىس قورىتىندىسى بويىنشا ءوڭىردىڭ قۇراما كومانداسى جاساقتالىپ, 17 ناۋرىزدا باستالاتىن التىنشى رەسپۋبليكالىق قىسقى سپارتاكياداعا قاتىسادى.