ەلىمىزدە 12 بلوگەر ءوز ەركىمەن 1,4 ملرد تەڭگە كولەمىندە قوسىمشا تابىستارىن دەكلاراتسيالاپ, 73,6 ملن تەڭگە سالىق تولەدى, دەپ حابارلايدى Egemen.kz.
مەملەكەتتىك كىرىستەر كوميتەتىنىڭ مالىمەتىنشە, بۇگىندە بارلىعى 854 بلوگەرگە «كىرىستى تومەندەتۋ» بويىنشا زاڭ بۇزۋشىلىقتار ءۇشىن 71,9 ملرد تەڭگە سوماسىندا كامەرالدىق باقىلاۋ تۋرالى حابارلامالار جىبەرىلگەن. ولاردى ورىنداۋ مەرزىمى – 30 جۇمىس كۇنى.
«71,9 ملرد تەڭگە كولەمىندەگى ايىرماشىلىقتار تولەنبەگەن سالىقتاردىڭ سوماسى ەمەس ەكەنىن اتاپ وتكەن ءجون. كورسەتىلگەن ايىرماشىلىق سومالارى بلوگەرلەردىڭ سالىق دەكلاراتسيالارىندا كورسەتىلمەگەن بولجامدى تابىستارىن بىلدىرەدى», دەلىنگەن حابارلامادا.
ەستەرىڭىزگە سالا كەتەيىك, سالىقتاردىڭ ەسەپتەلۋى مەن تولەنۋى سالىق زاڭناماسىندا بەلگىلەنگەن ءتيىستى ستاۆكالار بويىنشا ۇسىنىلعان دەكلاراتسيالارعا سايكەس جۇزەگە اسىرىلادى.
«كامەرالدىق باقىلاۋدىڭ ءمانى – سالىق تولەۋشىگە تابىستارىن ءوز ەركىمەن دەكلاراتسيالاپ, ەسەپتەلگەن سالىقتاردى تولەۋگە نەمەسە انىقتالعان بۇزۋشىلىقتارمەن كەلىسپەگەن جاعدايدا تۇسىندىرمە بەرۋگە مۇمكىندىك بەرۋ», دەپ حابارلادى ۆەدومستۆودان.