ىشكى ىستەر مينيسترلىگى ەسىرتكى قىلمىسىنا قارسى اۋقىمدى جۇمىستى جالعاستىرىپ كەلەدى. اقپان ايىندا ەسىرتكى قىلمىسىنا قارسى ءىس-قيمىل كوميتەتى جانە ونىڭ اۋماقتىق بولىنىستەرى 17 ەسىرتكى زەرتحاناسىن انىقتاپ, جويدى, دەپ حابارلايدى Egemen.kz.
سونىمەن قاتار 19 كۇدىكتى ۇستالىپ, زاڭسىز اينالىمنان 80 كەلىگە جۋىق ەسىرتكى زاتى تاركىلەندى.
«ەڭ ءىرى قىلمىستىق ىستەردىڭ ءبىرى قىزىلوردا وبلىسىندا انىقتالدى. مۇندا 46 جاستاعى ەر ادام – جاسىرىن ەسىرتكى زەرتحاناسىنىڭ ۇيىمداستىرۋشىسى جانە ونىڭ تۋىستارى ۇستالدى. ولار ەليتالىق سۇرىپتاعى قاراسورانى زاڭسىز ءوسىرىپ, ەسىرتكى زاتتارىن ءىرى كولەمدە ساقتاپ, ساتۋدى جوسپارلاعان. جەدەل ءىس-شارالار بارىسىندا پوليتسيا قىزمەتكەرلەرى كۇدىكتىنىڭ بىتپەگەن ۇيىندە فيتوزەرتحانانى انىقتادى. ول جىل بويى وسىمدىك وسىرۋگە قاجەتتى جارىقتاندىرۋ, جەلدەتۋ جانە سۋارۋ جۇيەلەرىمەن جابدىقتالعان. ارنايى وپەراتسيا ناتيجەسىندە 19 كەلىدەن استام «گوللاندتىق قاراسورا» تاركىلەندى», دەدى ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى دانيار مەيىرحان.
جىل باسىنان بەرى قازاقستاندا 42 ەسىرتكى زەرتحاناسى جويىلدى, 45 كۇدىكتى ۇستالدى. زاڭسىز اينالىمنان 100 كەلىدەن استام ەسىرتكى جانە 5 توننادان استام پرەكۋرسور – ەسىرتكى وندىرىسىنە قاجەتتى حيميالىق زاتتار تاركىلەندى.