يۆاتە پرەفەكتۋراسىنىڭ وفۋناتو قالاسىنداعى ورمان ورتىنەن 80-نەن استام ءۇي ورتەنىپ, 2 مىڭعا جۋىق تۇرعىن ەۆاكۋاتسيالاندى, دەپ حابارلايدى Egemen.kz Kyodo News اگەنتتىگىنە سىلتەمە جاساپ.
ايتا كەتەيىك, بۇل وڭىردە شامامەن ءبىر اپتا ىشىندە بولعان ءۇشىنشى ءورت. جەرگىلىكتى بيلىكتىڭ حابارلاۋىنشا, سارسەنبىدە تۇتانعان ءورت 600 گەكتار جەردى شارپىعان. ءورتتى ءسوندىرۋ جۇمىستارى ءتۇنى بويى جالعاسقان. بەيسەنبى كۇنى تاڭەرتەڭ ءورتتى اۋادان ءسوندىرۋ ءۇشىن ءوزىن-ءوزى قورعاۋ كۇشتەرىنىڭ تىكۇشاقتارى جۇمىلدىرىلعان.
وقيعا ورنىندا ورتەنگەن دەنە تابىلعان, پوليتسيا ونىڭ ورتپەن بايلانىستى ەكەندىگىن انىقتاپ جاتىر.
«سونىمەن قاتار پرەمەر-ءمينيستردىڭ وفيسىندە ۇيلەستىرۋ شتابى قۇرىلعان. ۇكىمەت حاتشىسى يوسيماسا حاياسي ورتالىق ۇكىمەت جەرگىلىكتى بيلىكپەن «قاجەتتى قولداۋ كورسەتۋ ءۇشىن تىعىز ىنتىماقتاسا» جۇمىس ىستەيتىنىن مالىمدەدى. بەيسەنبى كۇنى وفۋناتو قالاسىندا مەكتەپتەر مەن بالاباقشالار جابىلدى, 500 ءۇي جارىقسىز قالدى. سونىمەن قاتار, قالاداعى تەمىرجول جەلىسىنىڭ ءبىر بولىگى بويىنشا قوزعالىس توقتاتىلدى», دەلىنگەن حابارلامادا.
19 اقپاندا وفۋناتو قالاسىندا تۇتانعان ورمان دۇيسەنبى كۇنى تاڭەرتەڭ سوندىرىلگەن. ەكىنشى ءورت سەيسەنبى كۇنى كورشىلەس ريكۋدزەنتاكاتا قالاسىندا بولىپ, سارسەنبى كۇنى وقشاۋلانعان.
الايدا سوڭعى ءورت ءبىرىنشى ورىنعا جاقىن جەردە بولعانىمەن, جەرگىلىكتى بيلىك ەكەۋىنىڭ ءبىر-بىرىمەن بايلانىسى بار-جوعىنا ءالى سەنىمدى ەمەس ەكەنىن مالىمدەگەن.