استانا. 4 مامىر. بۇگىن الماتى قالالىق ءماسليحاتىنىڭ كەزەكتەن تىس XXXIX سەسسياسى ءوتتى. كۇن تارتىبىندە قالا اكىمىن تاعايىنداۋ ماسەلەسى قارالدى. بۇل تۋرالى «قازاقپارات» حابارلادى.
سەسسياعا قالالىق ءماسليحاتتىڭ 30 دەپۋتاتى قاتىستى. ال 5 ادام بەلگىلى سەبەپتەرمەن قاتىسا المادى.
دەپۋتاتتار قالا اكىمىنىڭ لاۋازىمىنا مەملەكەت باسشىسى نۇرسۇلتان نازارباەۆ ۇسىنعان احمەتجان ەسىموۆتىڭ كانديداتۋراسىن ءبىراۋىزدان قولدادى.
الماتى قالالىق ءماسليحاتى V شاقىرىلىمىنىڭ حاتشىسى قالدىباي قازانباەۆ مەملەكەت باسشىسىنىڭ ۇسىنىسىن وقىپ ءوتتى.
«قۇرمەتتى دەپۋتتار! قازاقستان رەسپۋبليكاسى كونستيتۋتسياسىنىڭ 87-بابىنىن 4-تارماعىنا سايكەس الماتى قالاسى اكىمى لاۋازىمىنا تاعايىنداۋعا كەلىسۋ ءۇشىن احمەتجان ەسىموۆتىڭ كانديداتۋراسىن ۇسىنىپ وتىرمىن. احمەتجان ەسىموۆ 1950 جىلى تۋعان. قازاق اۋىل شارۋاشىلىعى ينستيتۋتىن, قوعامدىق عىلىمدار اكادەمياسىن بىتىرگەن. ەكونوميكا عىلىمدارىنىڭ دوكتورى, مەملەكەتتىك باسقارۋ ورگاندارىندا, ديپلوماتيا سالاسىنداعى باسشى لاۋازىمىندا مول جۇمىس تاجىريبەسى بار. پرەمەر-ءمينيستردىڭ ورىنباسارى, پرەزيدەنت اپپاراتىنىڭ باسشىسى, اۋىل شارۋاشىلىعى ءمينيسترى, قازاقستاننىڭ بەلگيا كورولدىگىندەگى وكىلەتتى ەلشىسى قىزمەتىن اتقارعان. 2008 جىلدىڭ ءساۋىر ايىنان الماتى قالاسى اكىمى قىزمەتىنە تاعايىندالعان. قولداۋلارىڭىزدى سۇرايمىن», – دەلىنگەن مەملەكەت باسشىسىنىڭ ۇسىنىسىندا.
ءوز كەزەگىندە دەپۋتاتتار قالانىڭ كوركەيىپ, دامۋىندا, ەكونوميكالىق تۇرعىدان نىعايۋىنا احمەتجان ەسىموۆتىڭ قوسقان ۇلەسى ۇشان-تەڭىز ەكەندىگىن اتاپ ءوتتى.
«وتكەندە عانا 2014 جىلعى دامۋ كورسەتكىشتەرىمەن تانىستىق. الماتى قالاسىنىڭ جالپى رەسپۋبليكالىق ءجاو كورسەتكىشىندەگى ۇلەسى 20,7 پايىزدى قۇرادى. بۇل كوپ نارسەدەن حابار بەرەدى. قالا تۇرعىندارىنىڭ دەپوزيتتەگى قارجىسىنىڭ سوماسى 2 ترلن. تەڭگەگە جەتتى. بۇدان قالا حالقىنىڭ تابىسى ارتىپ كەلە جاتقاندىعىن كورەمىز. ماعان كورسەتكەن سەنىمدەرىڭىزگە راحمەت. بۇل – تەك مەنىڭ عانا ەڭبەگىم ەمەس, ءبىر كوماندانىڭ بىرىگە اتقارعان جۇمىسىنىڭ ناتيجەسى», – دەدى احمەتجان ەسىموۆ.
ەلامان قوڭىر.
دەرەك: «قازاقپارات».
سۋرەت: news.headline.kz.