استانا قالاسىنداعى ۇلتتىق مۋزەيدە مادەنيەت جانە اقپارات ءمينيسترى ايدا بالاەۆانىڭ قاتىسۋىمەن 2024 جىلعى جاستارعا ارنالعان پرەزيدەنتتىك ارناۋلى ادەبي سىيلىق جەڭىمپازدارىن ماراپاتتاۋ ءراسىمى ءوتتى, دەپ جازادى Egemen.kz.
ونىڭ ىشىندە «Egemen Qazaqstan» گازەتى, مادەنيەت جانە ادەبيەت ءبولىمىنىڭ باسشىسى, ارىپتەسىمىز جانىبەك اليمان «پوەزيا» اتالىمىندا «بوز ۇشقات» ولەڭدەر جيناعى ءۇشىن ماراپاتتالدى.
سونداي-اق پرەزيدەنتتىك ارناۋلى ادەبي سىيلىعى «پروزا» نوميناتسياسى بويىنشا «2026» شىعارماسى ءۇشىن ەسبول سوتسيالحانعا, «دراماتۋرگيا» نوميناتسياسى بويىنشا «اپاتاي» درامالىق تۋىندىسى ءۇشىن اليشەر ايتۋارعا, «بالالار ادەبيەتى» نوميناتسياسى بويىنشا «روكەت ەرا» پوۆەسى ءۇشىن اسەت سىزدىقوۆقا بەرىلدى.
«جاس قازاقستاندىق جازۋشىلار مەن اقىندارعا ارنالعان پرەزيدەنتتىك ادەبي سىيلىق 2023 جىلى پرەزيدەنت جارلىعىمەن تاعايىندالىپ, وتاندىق ادەبيەت الەمىندەگى ماڭىزدى وقيعالاردىڭ بىرىنە اينالدى. بۇل – مەملەكەت باسشىسىنىڭ مادەنيەت سالاسىن جۇيەلى تۇردە جاڭعىرتۋعا باعىتتالعان باستامالارىنىڭ ءبىرى. بۇل سىيلىقتىڭ باستى ماقساتى – شىعارماشىل جاستاردى قولداۋ, جاڭا تۋىندىلاردىڭ جارىق كورۋىنە جول اشۋ. مەملەكەت باسشىسىنىڭ مادەنيەت پەن ونەردى دامىتۋعا ەرەكشە ءمان بەرۋى – ونىڭ ۇستانىپ وتىرعان رەفورمالارى مەن باستامالارىنىڭ زاڭدى جالعاسى. ويتكەنى مادەنيەتتى, ادەبيەتتى دامىتۋ – جاس ۇرپاقتىڭ جان-جاقتى دامۋىنىڭ نەگىزگى تەتىكتەرىنىڭ ءبىرى. ال رۋحاني تۇرعىدان كەمەلدەنگەن, ءبىلىمدى, ەڭبەكسۇيگىش ءارى پاتريوت ازاماتتاردان قۇرالعان قوعامدا زاڭ مەن ءتارتىپ ۇستەمدىك قۇرادى, ادامدار ءوز ارەكەتتەرى ءۇشىن جاۋاپكەرشىلىك الادى, داستۇرگە قۇرمەتپەن قاراپ, ۇلتتىڭ نەگىزگى قۇندىلىقتارىن ارداقتايدى», دەدى ايدا بالاەۆا.
سونداي-اق مادەني ماجىلىستە مادەنيەت جانە اقپارات مينيسترلىگى مەن قازاقستان جازۋشىلار وداعىنىڭ ستراتەگيالىق ارىپتەستىگى اياسىندا «قازاقستاننىڭ ادەبي-تانىمدىق پانوراماسى» جوباسىمەن جارىق كورگەن 20 جاس قالامگەردىڭ كىتاپتارىنىڭ تۇساۋى كەسىلدى.