سەنات سپيكەرى ماۋلەن اشىمباەۆتىڭ توراعالىعىمەن بيۋرو ءوتتى. وندا دەپۋتاتتار 27 اقپانداعى وتىرىستىڭ كۇن ءتارتىبىن بەكىتىپ, كوميتەتتەردە كوتەرىلەتىن ماسەلەلەردى تالقىلادى.
بيۋرو مۇشەلەرى مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى جولداۋىن ىسكە اسىرۋ اياسىندا 28 اقپاندا «ەڭبەك ادامى – ۇلتتىق ەكونوميكانىڭ ءوسۋى مەن ەل وركەندەۋىنىڭ نەگىزى» تاقىرىبىنا ارنالعان پارلامەنتتىك تىڭداۋ وتكىزۋ تۋرالى قاۋلى قابىلدادى.
«پرەزيدەنت قاسىم-جومارت توقاەۆ 2025 جىلدى جۇمىسشى ماماندىقتارى جىلى دەپ جاريالاعانى بەلگىلى. بۇل باستاما ەڭبەك ادامىنىڭ بەدەلىن ارتتىرۋدى, جاستاردى وسى سالاعا جۇمىلدىرۋدى جانە ەڭبەك نارىعىندا سۇرانىسقا يە ماماندىقتار بويىنشا بىلىكتى كادرلار دايارلاۋدى كوزدەيدى. سوندىقتان كادر تاپشىلىعىن جانە بۇل باعىتتاعى باسقا دا وزەكتى ماسەلەلەردى جان-جاقتى زەردەلەپ, ولاردى شەشۋ ءۇشىن قاجەتتى شارالار قابىلداۋ اسا ماڭىزدى», دەدى سەنات توراعاسى.
وسى اپتادا سەنات كوميتەتتەرى مۇددەلى مەملەكەتتىك ورگانداردىڭ قاتىسۋىمەن وتكىزەتىن ءىس-شارالاردا يرريگاتسيا جۇيەلەرىن جاڭعىرتۋ, سۋ شارۋاشىلىعىنا قاجەتتى كادرلار دايارلاۋدى قامتاماسىز ەتۋ جانە بيولوگيالىق قاۋىپسىزدىك ماسەلەلەرى قوزعالادى.
سونىمەن قاتار مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى قازاقستان حالقىنا جولداۋىن ىسكە اسىرۋ اياسىندا جول قوزعالىسى قاۋىپسىزدىگىن قامتاماسىز ەتۋ جانە جول-كولىك وقيعالارىنىڭ الدىن الۋ ماسەلەلەرى», سونداي-اق «وزەكتى ينستيتۋتسيونالدىق نەگىزدەر: مەملەكەتتىك ءاۋديتتى ودان ءارى دامىتۋ» تاقىرىپتارىنا ارنالعان ەكى دوڭگەلەك ۇستەل ۇيىمداستىرىلادى.
بيۋرو وتىرىسىندا بەكىتىلگەن كۇن تارتىبىنە سايكەس پالاتا دەپۋتاتتارى الداعى بەيسەنبىدە «قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى قازاقستان رەسپۋبليكاسى مەن رەسەي فەدەراتسياسىنىڭ ءبىرتۇتاس ەنەرگەتيكالىق جۇيەلەرىنىڭ قاتار جۇمىس ىستەۋىن قامتاماسىز ەتۋ جونىندەگى شارالار تۋرالى كەلىسىمدى راتيفيكاتسيالاۋ تۋرالى», «بىرىككەن ۇلتتار ۇيىمىنىڭ ءبولۋدى باقىلاۋ جونىندەگى كۇشتەرىنە (UNDOF) رەسۋرس ۇسىناتىن قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمى اراسىنداعى ءوزارا تۇسىنىستىك تۋرالى مەموراندۋمدى راتيفيكاتسيالاۋ تۋرالى» جانە «2024 جىلعى 14 اقپانداعى بىرىككەن ۇلتتار ۇيىمىنىڭ ءبولۋدى باقىلاۋ جونىندەگى كۇشتەرىنە (UNDOF) رەسۋرس ۇسىناتىن قر ۇكىمەتى مەن بىرىككەن ۇلتتار ۇيىمى اراسىنداعى ءوزارا تۇسىنىستىك تۋرالى مەموراندۋمعا حاتتار الماسۋ نىسانىنداعى كەلىسىمدى راتيفيكاتسيالاۋ تۋرالى» زاڭداردى قارايدى. بۇل قۇجاتتار اتالعان سالالارداعى زاڭنامالاردى جەتىلدىرۋگە ارنالعان.
بۇعان قوسا پالاتا وتىرىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى اسكەري قىزمەت جانە جەكەلەگەن ورتالىق مەملەكەتتىك ورگانداردىڭ فۋنكتسيالارىن قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭدى ءبىرىنشى وقىلىمدا قارايدى. زاڭ قارۋلى كۇشتەردى, باسقا دا اسكەرلەر مەن اسكەري قۇرالىمداردى رەزەرۆ قيمىلدارىنا دايىن رەزەرۆتىك كۇشتەرمەن قامتاماسىز ەتۋ ءۇشىن قۇقىقتىق نەگىز قۇرۋ ماقساتىمەن ازىرلەندى.
بيۋرودا وسىعان دەيىن ماجىلىستەن كەلىپ تۇسكەن زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.