ۇلتتىق بانك مالىمەتىنشە, بىلتىر ەلىمىزدە يپوتەكا مەن اۆتونەسيە الۋشىلار سانى ارتىپ, تۇتىنۋشىلىق نەسيەگە سۇرانىس تومەندەگەن, دەپ جازادى Egemen.kz.
بانكتەر يپوتەكاعا سۇرانىستىڭ ارتۋىن قۇرىلىس كومپانيالارىمەن اراداعى سەرىكتەستىكتىڭ جالعاسۋى جانە جەكەلەگەن بانك تاراپىنان جاڭا ءونىمنىڭ شىعۋىمەن تۇسىندىرەدى. ەكىنشى جاعىنان, سۇرانىستى تەجەيتىن فاكتورلار ىشىندە جەكە بانكتەر يپوتەكالىق نەسيەلەۋ پورتفەلىن وسىرمەي, كەپىلمەن قامتاماسىز ەتۋ قۇنىنا قاتاڭ تالاپتاردى ۇستانعانىن اتاپ وتۋگە بولادى.
تۇتىنۋشىلىق نەسيەگە سۇرانىس ازداپ تومەندەگەن. بانكتەر بۇل ءۇردىستى سىياقى مولشەرلەمەسىنىڭ جوعارىلاۋىمەن بايلانىستىرىپ وتىر. سونىمەن قاتار, جەكەلەگەن بانك تاراپىنان كەپىل مۇلكىن باعالاۋ كورسەتكىشى وزگەرگەندىكتەن كەپىل تالاپتارى قاتاڭداي تۇسكەنى سەزىلىپ وتىر.
كەپىلسىز تۇتىنۋشىلىق قارىز الۋعا وتىنىمدەر سانى 20,2 ملن-دى قۇراعان, بۇل وتكەن توقسانداعىدان 2%-عا از.
2024 جىلى اۆتوكرەديتكە سۇرانىس ارتا تۇسكەن. بۇل كوبىنە اۆتوسالون-سەرىكتەستەر تاراپىنان ماركەتينگتىك شەشىمدەر جانە ولار ءىشىنارا سۋبسيديالايتىن بىرقاتار ناۋقاندىق ونىمدەردى ۇسىنۋى سەبەبىنەن ارتقان.
بانكتەر 2025 جىلدىڭ باسىنان اۆتوكرەديتكە سۇرانىس ارتادى دەپ بولجاپ وتىر. ال يپوتەكالىق قارىزدار مەن كەپىل ارقىلى بەرىلەتىن تۇتىنۋشىلىق قارىزدار بويىنشا سۇرانىس ازداپ تومەندەيدى, ال كەپىلسىز قارىزدار بويىنشا سۇرانىس وتكەن جىلدىڭ سوڭىنداعى دەڭگەيدە قالادى.
ۇلتتىق بانكتىڭ 2024 جىلدىڭ IV توقسانىندا كرەديتتەۋ بويىنشا بانكتەر اراسىندا جۇرگىزىلگەن ساۋالناماسىنا ەكىنشى دەڭگەيلى 19 بانك قاتىسقان.