بىرنەشە اپتا بۇرىن الەۋمەتتىك جەلىدە تاراعان بەينەكورىنىس جۇرتشىلىقتىڭ جۇرەگىن ەلجىرەتتى. قول باسىنداي عانا قۇيتاقانداي شاقالاقتى ەركەلەتىپ, بار مەيىرىمىن توگىپ, ويناتقان نەوناتولوگ دارىگەردىڭ ارەكەتىنە ساي بوبەك تە ك ۇلىمسىرەپ, بالداي ءتاتتى قىلىعىمەن «جاۋاپ بەرىپ» جاتتى.
كوبىنەسە انا مەن بالانىڭ مەيىرىمىنە عانا كۋا قوعام, ەر ادام مەن بوبەكتىڭ اراسىنداعى مەيىرىمگە تولى كورىنىستى اسا «تۇسىنە الماعانى دا» راس. دەگەنمەن ولاردى نە بايلانىستىراتىنىن بىلگەندە, تاڭ قالماعان جان قالمادى.
تۋا سالا اناسى باس تارتقانى ازداي, تۋىلا سالا ءومىرى ءۇشىن كۇرەسىپ بىرنەشە اي ارنايى مەديتسينالىق قوندىرعىلارعا تاڭىلعان بوبەك پەن ونى كۇتۋشى نەوناتولوگ دارىگەرىنىڭ ءۇش اي بويى ءبىر بىرىنە باۋىر باسقان كورىنىسى ەكەن.
نەوناتولوگ دارىگەر بەرىك الدياروۆتىڭ ايتۋىنشا, نارەستە وتە ءالسىز بولىپ تۋىلعان. دارىگەرلەر ونى اپپاراتتارعا قوسىپ, كۇندىز-ءتۇنى باقىلاعان. ۋاقىت وتە كەلە ول ءوز بەتىنشە دەم الۋدى ۇيرەنىپ, تولىق ساۋىعىپ كەتكەن. اناسى باس تارتقان قىز بالانى دارىگەر بالالار ۇيىنە الىپ كەتكەنشە ءوزى قاراعان. «العاشقى كۇندەر وتە اۋىر بولدى. ءار ساعات سايىن ءبىز ارىپتەستەرىمىزبەن بىرگە ونىڭ جۇرەگى سوعۋىن جالعاستىرۋ ءۇشىن ءبارىن جاسادىق. ءبىز اپپاراتتاردى رەتتەپ, دارىلەر ەنگىزىپ, ونىڭ نازىك دەنەسىن جىلىتىپ, اناسىنىڭ ىشىندەگى جىلۋلىقتى ەسكە سالىپ وتىردىق. اپتالار ءوتتى. بالا بىرتىندەپ كۇش جيناي باستادى. ول وزدىگىنەن تىنىس الۋدى ۇيرەندى. ءبىز ونىڭ جەتىستىكتەرىنە ءبارىمىز جان-تانىمىزبەن قۋاندىق. مەن كوز جاسىمدى ۇستاي المادىم. ول ماعان ۇلكەن كوزدەرىمەن قارادى, ءبىز ونىڭ ءومىرى ءۇشىن بار جانىمىزبەن كۇرەسكەنىمىزدى بىلەتىن سياقتى بولدى. قانداي كۇش پەن ومىرگە دەگەن ەرىك-جىگەر وسىنداي كىشكەنتاي ادامدا بولۋى مۇمكىن», — دەيدى دارىگەر سول كۇندەردى ەسكە الىپ.
قوعامدا ءار ماماننىڭ ورنى بولەك. دەگەنمەن ماماندىعىنا بارىن سالىپ قىزمەتىن مەيىرىمىمەن, بار ىنتا جىگەرىمەن جاسايتىندار از ەكەنى راس. سول ازدىڭ ءبىرى بەرىك الدياروۆتىڭ شاقالاقتىڭ ءومىرىن ساقتاۋعا بارىن سالىپ, اناسىنىڭ ورنىنا ءوز تۋعان اناسىنداي مەيىرىمى مەن قامقورلىعىن توگۋى تالايلاردىڭ جۇرەگىن ءجىبىتتى. ادەتتە اتاقتىلار عانا ماراپاتتالىپ جاتاتىن قوعامىمىزدا قاراپايىم ازاماتتاردى دا ەلەپ ەسكەرىپ, ەرەكشە ارەكەتىمەن نەمەسە ەڭبەگىمەن كوزگە تۇسكەن جانداردى قۋانتىپ جۇرەتىن دينارا بەردىمۇرات مەيىرىمدى دارىگەردى ارنايى «ەل جاناشىرى» توسبەلگىسىمەن ماراپاتتادى. ارقاشان جاڭا قازاقستانىمىزدىڭ دامۋىنا ۇلەس قوسىپ جۇرگەن تۇلعالارىمىزدىڭ ەڭبەگىن ەلەپ, ەرەن ەڭبەگىنە ساي قۇرمەت كورسەتىلەتىن بۇل ماراپاتتىڭ ءجونى بولەك. قوعامداعى ادال قىزمەتىمەن كوزگە ءتۇسىپ جۇرگەن جانداردى باسقالارعا ۇلگى ەتۋ ماقساتىندا جاسالاتىن بۇل شارا قازىر ءداستۇرلى ماراپاتقا اينالىپ كەلەدى.
وسى ورايدا ايتا كەتسەك, پرەزيدەنت قاسىم-جومارت توقاەۆ ەڭبەك ادامدارىنا قۇرمەت كورسەتۋ كەرەك ەكەنىن بىرنەشە رەت اتاپ وتكەن بولاتىن. ال مۇنداي ماراپاتتار قاراپايىم ازاماتتاردى ىنتالاندىرىپ, قوعامدى ىزگىلەندىرۋگە ىقپال ەتەرى انىق! كورىنىسكە سۇيسىنگەندەر كوپ بولعانىمەن, ونى سول ارەكەتى ءۇشىن ەلەپ ەسكەرىپ, قۇرمەت كورسەتۋ دينارا بەردىمۇراتتىڭ عانا قولىنان كەلدى. ماماندىعىنا ادالدىق تانىتىپ, قوعامعا مەيىرىمدىلىك ءدانىن سەۋىپ جۇرگەن دارىگەر بەرىك الدياروۆقا دا, بەيبىت كۇننىڭ باتىرىنا لايىق قۇرمەت كورسەتكەنى ءۇشىن دينارا بەردىمۇراتقا دا العىسىمىز شەكسىز! الەمدى مەيىرىمدىلىك قۇتقارادى…