وقۋ-اعارتۋ مينيسترلىگىنىڭ «100 جاڭا ەسىم – 100 جاڭا تۇلعا» ايدارىنىڭ كەيىپكەرى, قوستاناي اۋدانى الەكساندر اۋىلدىق مەكتەبىنىڭ 10-سىنىپ وقۋشىسى ۆيكتور رىجكوۆ سۋ دەڭگەيىنىڭ كۇرت كوتەرىلۋى كەزىندە كوپىرلەردىڭ بۇزىلۋىنا جول بەرمەيتىن يننوۆاتسيالىق جۇيەنى قۇراستىرىپ شىعاردى.
«Smart Bridge» دەپ اتالاتىن اۆتوماتتاندىرىلعان جۇيە سۋ دەڭگەيىنىڭ شەكتەن تىس كوتەرىلۋىنە جول بەرمەيدى. كوپىرگە ءتونىپ كەلە جاتقان قاۋىپتى سۋ كوتەرىلە باستاعاننان-اق انىقتاپ, الدىن الا تىركەيدى. ال ارنايى باعدارلامامەن جۇمىس ىستەيتىن «Arduino» ميكروباقىلاعىشى كوپىردى كوتەرەتىن تەتىكتى بىردەن ىسكە قوسادى.
ونىنشى سىنىپتا وقيتىن ۆيكتور مۇنىمەن وتكەن جىلى كوكتەمگى سۋ تاسقىنىنان كەيىن اينالىسا باستاعان.
ء«بىز ويلاپ تاپقان جۇيەمەن قورعالعان كوپىر قانداي دۇلەي اعىسقا دا توتەپ بەرە الادى. بىلتىرعى تابيعي سيپاتتاعى توتەنشە جاعدايدان كەيىن جالپى تۇرعىنداردىڭ, ينفراقۇرىلىمنىڭ سۋ تاسقىنىنا قاشاندا دايىن بولۋىنا كومەكتەسەتىن جۇيە جاساپ شىعارعىمىز كەلدى. جوبانى جاساۋ بارىسىندا كوپىردى كوتەرەتىن قۋاتتى تەتىكتى تاڭداۋ ءبىراز قيىندىق تۋدىردى. الايدا ۇزاق ىزدەنىستىڭ ناتيجەسىندە بۇل قيىندىقتى دا ەڭسەرىپ, جوبامىزدى ءساتتى اياقتاپ شىقتىق», دەيدى دارىندى وقۋشىنىڭ ۇستازى ۆيتالي بازاركين.
الداعى ۋاقىتتا ۆيكتور ءوز ونەرتابىسىن كوپىر ساتىلى تۇردە كوتەرىلەتىندەي ەتىپ جانە جەدەل قىزمەتتەرگە اۆتوماتتى تۇردە حابارلاما جىبەرەتىن راديوقۇرىلعىمەن جەتىلدىرۋدى جوسپارلاپ وتىر. بۇل قاۋىپ تونگەن ساتتە دەر كەزىندە ساقتىق شارالارىن قابىلداپ ۇلگەرۋگە مۇمكىندىك بەرەدى.
اتالعان جوبا قازىردىڭ وزىندە جوعارى باعالانىپ, « ۇلى ونەرتابىسقا العاشقى قادام» رەسپۋبليكالىق يننوۆاتسيالىق يدەيالار بايقاۋىندا «ونەركاسىپ سالاسىنداعى تەحنيكالىق قۇرىلىس» اتالىمى بويىنشا ءبىرىنشى ورىنعا يە بولدى.
قوستاناي وبلىسى