اقتوبە قالاسى جىل وتكەن سايىن كوركەيىپ, كورىكتەنىپ كەلەدى. قالا قاناتىن كەڭگە جايىپ, جاڭا شاعىن اۋداندار بوي كوتەرۋدە. شاھاردىڭ شاعىن اۋداندارىنا ءۇش-ءتورت اي اتباسىن تىرەمەسەڭ ءىرى قۇرىلىستار الدىڭنان شىعا كەلەدى دەسەك ارتىق ايتقاندىق بولماس. بۇعان مەملەكەتتىك قولداۋلار دا سەرپىن بەرۋدە. ۇستىمىزدەگى جىلى «نۇر اقتوبە» شاعىن اۋدانىندا, «زارەچنىي-3», كىرپىشتى, قارعالى ەلدى مەكەندەرىندە «نۇرلى جول» مەملەكەتتىك باعدارلاماسى اياسىندا تۇرعىن ۇيلەر مەن ءبىلىم بەرۋ نىساندارىنىڭ قۇرىلىسىن سالۋ كوزدەلۋدە. بۇل ماقساتقا ۇلتتىق قوردان 3 979,3 ميلليون تەڭگە بولىنگەن.
– ۇلتتىق قوردان بولىنگەن 1 150 ميلليون تەڭگەگە 3 جاڭا ءبىلىم بەرۋ نىسانى سالىنادى. «زارەچنىي-3» ەلدى مەكەنىندە 600 ورىندىق ءجانە كىرپىشتى اۋىلىندا 320 ورىندىق مەكتەپتىڭ, سونداي-اق, قارعالى ەلدى مەكەنىندە 320 ورىندىق بالاباقشانىڭ قۇرىلىسى باستالادى. قازىرگى تاڭدا «زارەچنىي-3», كىرپىشتى, قارعالى ەلدى مەكەندەرىندە سالىناتىن جاڭا ءبىلىم بەرۋ نىساندارىنىڭ قۇرىلىسىنا قاتىستى قۇجاتتار دايىندالىپ, قۇرىلىس-قۇراستىرۋ جۇمىستارىنا دايىندىق جاسالۋدا. ال «نۇر اقتوبە» شاعىن اۋدانىنداعى 1200 ورىندىق ورتا مەكتەپ پەن 320 ورىندىق بالاباقشانىڭ قۇرىلىسى جالعاسۋدا. جىل اياعىنا دەيىن ەكى نىسان دا پايدالانۋعا بەرىلەدى, – دەيدى اقتوبە قالاسى اكىمىنىڭ كەڭەسشىسى گەننادي دۋداكوۆ.
سونداي-اق, اتالعان باعدارلاما اياسىندا ۇلتتىق قوردان بولىنەتىن 2 500,0 ميلليون تەڭگەگە «نۇر اقتوبە» شاعىن اۋدانىندا 3 نەسيەلىك تۇرعىن ءۇيدىڭ قۇرىلىسى باستالادى دەپ كۇتىلۋدە. بۇل ۇيلەردىڭ قۇرىلىسىن مەردىگەر ۇيىم – «اقتوبە-ساۋلەت» جشس جۇرگىزەدى. سەرىكتەستىك ديرەكتورى ارنۇر اقمادي «نۇر اقتوبە» شاعىن اۋدانىنداعى №20 ءۇيدىڭ قۇرىلىس جۇمىستارى جىل سوڭىنا دەيىن اياقتالاتىنىن ايتادى. قازىردىڭ وزىندە بۇل ءۇيدىڭ ىشكى جۇمىستارىنىڭ 60 پايىزى اتقارىلعان كورىنەدى. جىلۋ جۇيەسى, گاز, سۋ قۇبىرلارى ورناتىلىپ, ەدەندەرىن توسەۋ جۇمىستارى جاسالىنىپ جاتىر. قۇرىلىسقا نەگىزىنەن جەرگىلىكتى ماتەريالدار عانا قولدانىلۋدا. مۇندا 560 ادام جۇمىس ىستەيدى.
سونداي-اق «نۇر اقتوبە» شاعىن اۋدانىندا نەسيەلىك باعىت بويىنشا 3 كوپقاباتتى تۇرعىن ءۇي سالۋ قارالعان. بۇل ۇيلەر «تۇرعىنۇيقۇرىلىسجيناقبانكى» اكتسيونەرلىك قوعامى ارقىلى پايدالانۋعا بەرىلگەن كەزدە 540 وتباسى باسپانالى بولماق. سونداي-اق, وسى شاعىن اۋداندا ۇلتتىق قوردان بولىنەتىن 2500,0 ميلليون تەڭگەگە سالىناتىن 3 نەسيەلىك تۇرعىن ءۇي «قولجەتىمدى تۇرعىن ءۇي-2020» باعدارلاماسى اياسىندا 234 جاس وتباسىعا جانە 207 جەرگىلىكتى اتقارۋ ورگاندارىنىڭ كەزەكتە تۇرعان ازاماتتارىنا جالعا بەرىلەدى. ياعني بيىل جانە كەلەر جىلى 981 اقتوبەلىك باسپانالى بولادى دەپ كۇتىلۋدە. ال جەكە تۇرعىن ءۇي سالۋ دا جالعاسىن تابۋدا. ءبىر سوزبەن ايتقاندا, وڭىردە تۇرعىن ءۇي قۇرىلىسى قىزا تۇسكەن دەۋگە ابدەن بولادى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.