ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى قاتەرلى ىسىك اۋرۋىنا قارسى قولدانىلاتىن دارىلىك پرەپاراتتاردى جەتىلدىردى.
ۋنيۆەرسيتەت ماماندارى ىلە-بالقاش وڭىرىندە وسەتىن بۇرشاقتۇستى تۇيەتابان وسىمدىگىن زەرتتەپ, ونى قاتەرلى ىسىك اۋرۋىنا قارسى دارىلىك پرەپاراتتار قۇرامىندا قولدانۋعا بولاتىنىن انىقتادى.
بۇرشاقتۇستى تۇيەتابان ەرتەرەكتە حالىق مەديتسيناسىندا كەڭىنەن قولدانىلعانمەن, عىلىمي تۇرعىدا تولىق زەرتتەلىپ بولماعان. قازۇۋ عالىمدارى العاش رەت فيتوحيميالىق جانە بيولوگيالىق قۇرامىنداعى بەلسەندى زاتتاردى انىقتاۋ ساراپتاماسىن جاساپ, الداعى ۋاقىتتا وتاندىق فارماتسەۆتيكانى دامىتۋعا سەپتىگىن تيگىزەتىندىگىنە زور سەنىممەن قارايدى.
«جوبا ناتيجەسىندە بۇرشاقتۇستى تۇيەتابان وسىمدىگىنىڭ بيولوگيالىق بەلسەندىلىگى جوعارى ەكەنى انىقتالدى. وسىمدىك سىعىندىلارى انتيوكسيدانتتىق, ميكروبقا قارسى جانە تسيتوۋىتتىلىق قاسيەتتەرىمەن ەرەكشەلەندى. ماسەلەن, ەتانول سىعىندىسى كۇشتى انتيوكسيدانتتىق بەلسەندىلىك كورسەتسە, ەتيل اتسەتاتىنىڭ سىعىندىسىن باكتەريالارعا قارسى قولدانۋعا بولادى. سونداي-اق وسىمدىكتىڭ بەلگىلى ءبىر سىعىندىلارى لەيكەميا جاسۋشالارىنا قارسى تۇرا الاتىنى زەرتتەلدى. مۇنى بولاشاقتا قاتەرلى ىسىك اۋرۋىنا قارسى دايىندالاتىن دارىلەردە پايدالانۋعا بولادى», دەيدى قازۇۋ-دىڭ اعا وقىتۋشىسى, دوكتورانت گۇلزات قايرانوۆا.
قازىرگى كەزدە عىلىمي جوبامەن قاۋىمداستىرىلعان پروفەسسور اسەم مامۋروۆا, PhD, تۇركيا پروفەسسورى احمەت بەياتلى جانە قازۇۋ دوكتورانتى گۇلزات قايرانوۆا اينالىسىپ جاتىر.
ۋنيۆەرسيتەتتىڭ ءباسپاسوز قىزمەتىنەن حابارلاعانداي, الداعى ۋاقىتتا ماماندار پاتەنت الۋ جاعىن جوسپارلاپ, جوعارى رەيتينگتىك عىلىمي جۋرنالدارعا ماقالا جاريالاماقشى.