كەلەسى جىلى قازاقستان جانە رەسەي پرەزيدەنتتەرىنىڭ قاتىسۋىمەن قىزىلجار وڭىرىندە ايماقارالىق فورۋمنىڭ وتەتىنىنە بايلانىستى ماڭىزدى شاراعا ءتاستۇيىن دايىندىق قىزۋ جالعاسىن تاپتى.
سولاردىڭ بىرىنە وبلىس ورتالىعىندا «Hampton by Hilton» ەليتالىق قوناقۇيدىڭ ىرگەتاسىن قالاۋعا ارنالعان ءراسىمدى اتاۋعا بولادى. اتالمىش نىساننىڭ جوباسىن ارنايى تاپسىرىسپەن ماسكەۋلىك ماماندار جاساپتى. جەتى قاباتتان تۇراتىن 4 جۇلدىزدى كوپبەيىندى قوناقۇي كەشەنىندە 120 ءنومىر بولادى: ولاردىڭ 2-ەۋى– پرەزيدەنتتىك, 2-ەۋى – ليۋكس, 10-ى – دەليۋكس, قالعاندارى – ستاندارتتى نومىرلەر. كوزدىڭ جاۋىن الاتىن عيماراتتا سونىمەن قاتار, فيتنەس ورتالىعى, كونفەرەنتس زالى, مەيرامحانا, حولل, ال تومەنگى قاباتتاردا سۋپەرماركەت, ساۋدا ورىندارى ورنالاسادى. جالپى, اۋماعى 11 مىڭ شارشى مەتردى قۇرايتىن ءارى وبلىستا بالاماسى جوق كەشەننىڭ قۇنى 1 ميلليارد 23 ميلليون تەڭگەگە باعالانىپ وتىر.
– ينۆەستور مەن باس مەردىگەر الەمدىك تالاپتارعا تولىق جاۋاپ بەرەتىن نىساندى ءبىر جىلدىڭ ىشىندە پايدالانۋعا بەرۋگە مىندەتتەنىپ وتىر. العاشقى كوپبەيىندى قوناقۇي وڭىردە ءتۋريزمدى دامىتۋعا, ەليتالىق بيزنەس وكىلدەرىن جوعارى دارەجەدە قابىلداۋعا ءمۇمكىندىك بەرەدى, – دەي كەلىپ, وبلىس اكىمىنىڭ ورىنباسارى ەرلان اۋكەنوۆ جەرگىلىكتى قۇرىلىس ماتەريالدارىن كەڭىنەن قولدانۋ قاجەتتىگىن اتاپ كورسەتتى.
اتالمىش نىساننىڭ قۇرىلتايشىسى, پەتروپاۆل قالاسىنىڭ تۋماسى دميتري كوشەلەۆ باس مەردىگەر «ۋدارنيك سك» جشس بولىپ تابىلاتىنىن, قۇرىلىسقا «Nord hotel Group» كومپانياسىنىڭ قارجىسى جۇمسالاتىنىن جەتكىزدى. سونىمەن بىرگە, بانك نەسيەسىنىڭ سىياقىسىن دەمەۋقارجىلاندىرۋعا جانە ينفراقۇرىلىمدار تارتۋعا «بيزنەستىڭ جول كارتاسى-2020» باعدارلاماسى ءجانە «دامۋ»قورى ارقىلى مەملەكەتتىك قولداۋ كورسەتۋ بەلگىلەنگەن. ونىڭ سوزىنە قاراعاندا, رەسەي مەن قازاقستاندا ۇلگىلى عيماراتتار سالۋمەن اينالىساتىن سەرىكتەستىكتىڭ تاجىريبەسى مول كورىنەدى. تورتكۇل دۇنيەگە كەڭىنەن تانىمال «Hilton» برەندىن قولدانۋ قالانىڭ قاق تورىندە ساۋلەتتى عيماراتتىڭ بوي كوتەرەتىنىنە سەنىمدى.
سالتاناتتى راسىمنەن كەيىن «Hampton by Hilton» قوناقۇيىنىڭ قۇرىلىسىنا ارنالعان كاپسۋلا تاسقا بۇرعىلانعان ويىققا ورناتىلدى.
جەكە ينۆەستورلاردىڭ قاراجاتىنا تۇرعىزىلىپ جاتقان تاعى ءبىر جاڭا قوناقۇيدىڭ ىشكى ارلەۋ جۇمىستارى اتقارىلۋدا. ءۇشىنشى قوناقۇيدىڭ قۇرىلىسى تاياۋ ۋاقىتتا باستالادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.