جاقىندا اقتوبە قالاسىندا ءبىر كۇندە ەكى بالاباقشا اشىلدى. «باتىس-2» شاعىن اۋدانىندا بوي كوتەرگەن ءۇش قاباتتى «ايلين» بالاباقشاسىنىڭ ءسانى مەن سالتاناتى كەلىسىپ, جۇتىنىپ-اق تۇر. 320 ورىندىق ەڭسەلى عيماراتتىڭ جالپى الاڭى – 3714,6 شارشى مەتر. بالاباقشادا 12 توپ جۇمىس ىستەيدى. وسى زامانعى ۇلگىدە جابدىقتالعان عيماراتتىڭ دەربەس ترانسفورماتورلىق ستانساسى مەن جىلىتۋ قازاندىعى بار. مۇندا قازىر ءبىر مەزگىلدە 300 بالانى قابىلداسا, بولاشاقتا 500 بالاعا دەيىن تاربيەلەنەتىن بولادى. قۇنى 850 ميلليون تەڭگەنى قۇرايدى. بالاباقشانىڭ سالتاناتتى اشىلۋىندا وبلىس اكىمىارحيمەد مۇحامبەتوۆ ءسوز الىپ, ەلباسى نۇرسۇلتان نازارباەۆ وتكەن جىلعى «نۇرلى جول – بولاشاققا باستار جول» اتتى قازاقستان حالقىنا جولداۋىندا بالاباقشالارداعى ورىن تاپشىلىعىن, ءۇش اۋىسىمدى جانە اپاتتىق مەكتەپتەر ماسەلەلەرىن شەشۋگە ايرىقشا توقتالعانىن تىلگە تيەك ەتە كەلىپ, بۇگىنگى ءساتتى وسى تاپسىرمانى شەشۋدىڭ ايقىن مىسالى رەتىندە اتاپ ءوتتى. ءوڭىر باسشىسى بۇگىنگى تاڭدا وبلىستا بالالاردى مەكتەپكە دەيىنگى مەكەمەمەن قامتۋ كورسەتكىشى 87 پايىز, ياعني رەسپۋبليكالىق كورسەتكىشتەن 10 پايىزعا جوعارى بولىپ وتىرعانىن جەتكىزدى.
بۇل كاسىپكەر زامزەگۇل بايماعامبەتوۆا مەن جەكەمەنشىك سەرىكتەستىگى بويىنشا سالىپ وتىرعان ءتورتىنشى مەكتەپكە دەيىنگى مەكەمە بولىپ شىقتى. ونىڭ بالاباقشا مەڭگەرۋشىسى گۇلنار مۇراتوۆاعا سۋ جاڭا بالاباقشانىڭ سيمۆولدىق كىلتىن تاپسىرۋى دا سالتاناتتى ءساتتىڭ اجارىن اشا ءتۇستى.
وبلىس اكىمى ارحيمەد مۇحامبەتوۆ «زارەچنىي-4» ەلدى مەكەنىندەگى №47 «نۇر-اي» مەملەكەتتىك بالاباقشاسىنىڭ سالتاناتتى اشىلۋىنا قاتىسۋشى اتا-انالار مەن بۇلدىرشىندەردىڭ قۋانىشىنا ورتاقتاستى. «بالاپان» باعدارلاماسى اياسىندا سالىنعان بۇل نىسان 150 بالاعا ارنالعان. قۇرىلىستى «كۆارتس سپەتسسەرۆيس» جشس ساپالى سالىپ, قىسقا مەرزىمدە اياقتاعان.
سەرىكتەستىك ديرەكتورى ايدىن ەسمۇحانوۆ جينالعانداردى قۇتتىقتاپ, بالاباقشا مەڭگەرۋشىسى نازگۇل بالماعامبەتوۆاعا عيماراتتىڭ سيمۆولدىق كىلتىن سالتاناتتى جاعدايدا تاپسىردى. بالاباقشاداعى 6 توپتىڭ ارقايسىسىندا 25 بالا تاربيەلەنەتىن بولادى. مۇندا 50 ادام تۇراقتى جۇمىسپەن قامتىلادى.
بالاباقشادا مۋزىكالىق زال, ويىن جانە جاتىن بولمەلەر, مەديتسينالىق كابينەت, اسحانا, كىر جۋاتىن بولمە بار, جاڭا ۇلگىدەگى جيھازدارمەن جانە جابدىقتارمەن جاراقتاندىرىلعان. مەديتسينالىق بلوگتا پروتسەدۋرالىق ءجانە دەزينفەكتسيالىق قۇرالداردى دايىندايتىن بولمەلەر, سىرتقى الاڭىندا ءار توپقا ارنالعان كولەڭكەلى شاتىرلار مەن ويىن الاڭىندا شاعىن نىساندار, سپورتتىق-ەكولوگيالىق الاڭدار قاراستىرىلعان.
ۇستىمىزدەگى جىلى وبلىستا 7 بالاباقشا اشۋ جوسپارلانسا, قازىردىڭ وزىندە ەكەۋى پايدالانۋعا بەرىلدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.