الماتىدا كەڭەس اسكەرىنىڭ اۋعان جەرىنەن شىعارىلعانىنا 36 جىل تولۋىنا وراي ءداستۇرلى تاعزىم ەتۋ ءىس-شاراسى ءوتتى. جينالعاندار 28 گۆارديالىق-پانفيلوۆشىلار ساياباعىنداعى ماڭگىلىك الاۋ مەن ينتەرناتسيوناليست-جاۋىنگەرلەرگە ارنالعان ەسكەرتكىشكە گۇل شوقتارىن قويىپ, سوعىس زاردابىن تارتىپ, ومىردەن وتكەن جاۋىنگەرلەردىڭ رۋحىنا تاعزىم ەتتى.
سالتاناتتى شاراعا اۋعان سوعىسىنىڭ ارداگەرلەرى مەن ارداگەرلەر كەڭەسىنىڭ وكىلدەرى, ۇلتتىق ۇلان مەن قازاقستان رەسپۋبليكاسى قارۋلى كۇشتەرىنىڭ اسكەري قىزمەتشىلەرى, اسكەري جوعارى وقۋ ورىندارىنىڭ كۋرسانتتارى مەن قالا تۇرعىندارى قاتىستى.
ساياباققا جينالعان قاۋىم اۋعان سوعىسىندا قازا تاپقان جاۋىنگەرلەردىڭ رۋحىنا باس ءيىپ, ولاردى ءبىر مينۋتتىق ۇنسىزدىكپەن ەسكە الدى. بۇدان كەيىن اۋعان ارداگەرلەرى ءسوز الىپ, سوعىس اقتاڭداقتارى تۋرالى ەستەلىكتەرىمەن ءبولىستى.
«مەن اۋعانستاننىڭ باگرام ەلدى-مەكەنىندە توقتاعان جەكە بارلاۋ باتالونىندا دارىگەر بولىپ قىزمەت ەتتىم. «شەپسىز مايدان» اتالىپ كەتكەن ۇرىس قيمىلدارىندا جاراقات العان جاۋىنگەرلەرگە مەديتسينالىق جاردەم كورسەتۋ باستى مىندەت بولدى. سولارمەن قويان-قولتىق ءجۇرىپ, ۇرىس ۇستىندە قىزمەتىمدى اتقاردىم. ءوزىمىز دە جاراقات العان كەزدەر بولدى. بىردە, اۆتوموبيلدەر لەگىمەن كەلە جاتقانىمىزدا سالانگ اسۋىنان وتكەننەن كەيىن مودجاحەتتەر اتقان وقتىڭ استىندا قالدىق. جۇرگىزۋشىم الەكساندر پاۋتوۆ كولىكتەن شىعىپ, ولارعا قارسى وق جاۋدىردى. ءسويتىپ مەنى اجال وعىنان امان الىپ قالعان ەدى. بارلىق قارۋلاس جولداستارىما جانە ولاردىڭ جاقىندارىنا ۇلكەن ريزاشىلىعىمدى بىلدىرەمىن. بۇل وتە اۋىر مىندەت بولدى جانە ءبىز ونى اسا قۇرمەتپەن ورىندادىق», دەدى ۇلتتىق ۇلاننىڭ وتستاۆكاداعى پولكوۆنيگى ءسابيت ايماعانبەتوۆ.
جيىن سوڭىندا الماتى گارنيزونىنا قاراستى اسكەري بولىمدەر مەن اسكەري جوعارى وقۋ ورىندارىنىڭ كۋرسانتتارى سالتاناتتى شەرۋمەن ءجۇرىپ ءوتىپ, جيىن كونتسەرتتىك باعدارلاماعا ۇلاستى.
الماتى