باتىس قازاقستان وبلىسىنىڭ اكىمى ناريمان تورەعاليەۆ ورىنبور وبلىسىنا جۇمىس ساپارى اياسىندا ورىنبور وبلىسىنىڭ كوكتەمگى سۋ تاسقىنىن وتكىزۋ جونىندەگى ۆەدومستۆوارالىق كوميسسيا توراعاسىنىڭ ءبىرىنشى ورىنباسارى اندرەي ۆيازيكوۆپەن كەزدەستى. جيىنعا توتەنشە جاعدايلار دەپارتامەنتى, سۋ شارۋاشىلىعى باسقارماسى جانە روسگيدرومەت وكىلدەرى دە قاتىستى, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
كەزدەسۋدىڭ نەگىزگى تاقىرىبى سۋ تاسقىنى تۋرالى بولجامدار جانە سۋ تاسقىنى كەزەڭىندە تاراپتاردىڭ ءوزارا ارەكەتتەسۋى بولدى. ورىنبور وبلىسىنىڭ مەملەكەتتىك ورگاندارىنىڭ وكىلدەرى وبلىستاعى گيدرومەتەورولوگيالىق جاعداي, كوكتەمگى سۋ تاسقىنىنا دايىندىق شارالارى جانە باسقا دا نەگىزگى اسپەكتىلەر تۋرالى باياندامالار جاسادى.
«باتىس قازاقستان وبلىسى ءۇشىن ەڭ ماڭىزدى تابيعي نىسان ءارى نەگىزگى اۋىزسۋ جانە سۋ قامتاماسىز ەتۋ كوزى – جايىق وزەنى باسسەينى. ونىڭ بويىندا 87 ەلدى مەكەن ورنالاسقان, وندا وبلىس حالقىنىڭ 75%-ىنا دەيىن تۇرادى. سونىمەن قاتار, جايىق وزەنىنەن ورال قالاسىنىڭ شارۋاشىلىق-اۋىز سۋ قاجەتتىلىكتەرى ءۇشىن سۋ الىنادى», دەدى ناريمان تورەعاليەۆ.
ول سونداي-اق بولجامدار مەن سۋ قويماسىنىڭ كوكتەمگى سۋ تاسقىنىنا دايىندىق دەڭگەيىن ەسكەرە وتىرىپ, سۋ قويماسىنىڭ جۇمىس رەجيمىن قالىپتاسقان گيدرولوگيالىق جاعدايعا سايكەس رەتتەۋ قاجەتتىگىن اتاپ ءوتتى. بۇل جايىق وزەنىنىڭ تومەنگى اعىسىنداعى سۋ دەڭگەيىن كوپجىلدىق ورتاشا كورسەتكىشتەردە ۇستاپ تۇرۋعا مۇمكىندىك بەرەدى.
قازاقستاندىق تاراپ سۋ از بولعان كەزدە سۋدى اعىزۋ بىلتىرعى كورسەتكىشتەردەن تومەن بولماۋى تۋرالى ۇسىنىس جاسادى.
كەزدەسۋ ناتيجەسىندە تاراپتار سۋ تاسقىنىنا قارسى ءىس-قيمىل ماسەلەلەرى بويىنشا تىعىز ىنتىماقتاستىق, سونداي-اق سۋ تاسقىنى ارەكەتىنىڭ بارلىق كەزەڭىندە ۇزدىكسىز اقپارات الماسۋ تۋرالى كەلىسىمگە كەلدى.